Facebook Myanma harbiylari hamda ular nazorati ostidagi davlat idoralari va ommaviy axborot vositalariga Facebook va Instagram ijtimoiy tarmoqlaridan foydalanishni taqiqladi, deb yozadi “Kommersant”. Fevral oyi boshida Myanma harbiylari hokimiyatni o‘z qo‘liga olib, mamlakatda bir yilga favqulodda holat e’lon qilgan edi.
“Bugun biz Myanma armiyasi qo‘l ostidagi tashkilotlar, harbiylar tomonidan nazorat qilinadigan davlat idoralari va OAVning Facebook va Instagram’dan foydalanishini, shuningdek, platformalarda harbiylarga aloqador tijorat tashkilotlari tomonidan reklama joylanishini taqiqlaymiz”, — deyiladi Facebook bayonotida.
Kompaniya Myanmadagi vaziyatni favqulodda holat deb hisoblashini va Myanma jamoati va aholisining xavfsizligiga bee’tibor emasligini ta’kidladi.
Facebook’ning bayonotida aytilishicha, taqiq zarurati 1-fevral voqealaridan so‘ng tezlashib ketgan.
Eslatib o‘tamiz, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, ular mamlakat prezidenti va boshqa yuqori martabali amaldorlarni 2020-yil 8-noyabrda bo‘lib o‘tgan “saylovdagi firibgarliklar”ni tekshirmaganlikda ayblab, hibsga oldi. Qurolli Kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.
Mamlakatda 20-fevral kuni barcha tillardagi Wikipedia internet-ensiklopediyasi bloklandi. Bungacha Facebook, Instagram, WhatsApp bloklangan edi. Bundan tashqari, Myanmada Internet vaqti-vaqti bilan ishlamoqda. 14-fevralda esa u deyarli to‘liq uzib qo‘yilgan edi. Bunga mamlakatning yirik shaharlarida davlat to‘ntarishiga qarshi davom etayotgan norozilik namoyishlari sabab bo‘lgan.
Izoh (0)