Австралияда қабул қилинган янги қонунга кўра, Facebook ва Google сингари рақамли платформалар ўз контентларида янгиликларни улашиши учун маҳаллий оммавий ахборот воситалари ва ноширлар билан битим тузиши ёки уларга пул тўлаши керак. Бу ҳақда CNBC нашри хабар берди.
Рақамли платформалар тўлаши керак бўлган маблағ миқдори ҳеч қандай мустақил тижорий шартнома тузилмаслик шарти билан Австралия ҳукумати тайинлаган ҳакам томонидан ҳал қилинади.
Facebook билан келиб чиққан зиддиятлар туфайли қабул қилиниш олдидан қонунга тузатишлар киритилди. Ўзгартиришларга кўра, давлат томонидан тайинланган ҳакамнинг аралашувидан олдин, икки ой мобайнида платформа ва медиакомпания ноширларининг ўзлари шартнома тузиши мумкин.
«Парламент ҳукумат томонидан таклиф қилинган мажбурий музокаралар кодексини тасдиқлади, бу янгиликлар бўйича ОАВ ва рақамли платформалар ўртасидаги келишмовчиликларни бартараф этишга имкон беради. Натижада ахборот медиакомпаниялари ўзлари яратган контентлар учун муносиб мукофотланади», — дейилади хабарда.
Эслатиб ўтамиз, 18 февраль куни Facebook ижтимоий тармоғи австралиялик фойдаланувчилар ва оммавий ахборот воситаларини тармоқда маҳаллий ва халқаро янгиликларни улашиш имкониятидан маҳрум қилган эди. Бунга қабул қилиниши кутилаётган қонун сабабчи бўлган, унга кўра, янгиликлар улашилган тақдирда Facebook, Google ва бошқа платформалар ўз контентлари учун ОАВга пул тўлаши керак.
23 февраль куни эса Facebook ва Австралия раҳбарлари мамлакатда ижтимоий тармоқнинг тўлиқ фаолиятини тиклаш бўйича келишувга эришди.
Аввалроқ Facebook ижтимоий тармоғи сиёсий реклама тақиқлангани сабабли коронавирусга қарши эмлашнинг афзалликлари тўғрисидаги пуллик постларни блоклаётгани ҳақида хабар берилганди. Хабарга кўра, ижтимоий тармоқ алгоритмлари эмлаш марказлари, шунингдек, вакцинанинг таъсир механизмлари тўғрисидаги пуллик постларни тармоқдан олиб ташлайди. Бундай постлар камида 110 та гуруҳда блокланган — мазкур ҳолат алгоритмларнинг бу каби рекламаларни сиёсий деб ҳисоблаши билан боғлиқ.
Изоҳ (0)