Sanitariya-epidemiologik osoyishtalik va jamoat salomatligi xizmati boshlig‘ining o‘rinbosari Nurmat Otabekov vaksinalarni saqlash, hududlarga yetkazib berish uchun ko‘rilayotgan tayyorgarlik yuzasidan ma’lumot berdi, deya xabar bermoqda O‘zA.
“O‘tgan yillar davomida jami 21 ta vaksina saqlash ombori, shu jumladan, 1 ta milliy, 14 ta mintaqaviy va 6 ta tuman ombori qurilishi qo‘llab-quvvatlangan edi. Hozirgi vaqtda mamlakatimiz bo‘yicha 16 ta vaksina ombori qurib bitkazilib, 29 ta maxsus sovitkich o‘rnatildi. Qolgan 5 ta vaksina omborxonasi esa 2021-yilning birinchi choragi oxirigacha qurib, foydalanishga topshirilishi kutilmoqda.
2021-yilning ikkinchi choragi yakuniga qadar milliy omborxona ham qurib bitkaziladi. Barcha omborlarga yong‘in xavfsizligi va signalizatsiya tizimi o‘rnatilgan bo‘lib, ulardagi mavjud sovuqlikni ta’minlab berish tizimlari zamonaviy generatorlar va stabilizatorlarga ulangan.
Shuningdek, vaksinalarni xavfsiz va tezkor tashish uchun yurtimizga jami 17 ta avtorefrijirator, 206 Miniven-Labo avtomashinasi keltirildi. Viloyatlarga jami 34 ta muzxona, 10 121 dona termokonteyner va termosumka, 749 ta muzlatkich, birlamchi davolash-profilaktika muassasalariga 2 mingdan ortiq sovitkich o‘rnatilgan.
Barcha omborlar vaksinalarni yuklash-tushirish uskunalari, avtokaralar va maxsus kiyimlar bilan ta’minlandi.
Bundan tashqari, hududlarga jami 4000 harorat indikatori va 5000 muzlatish indikatori tarqatildi. Ehtiyot qismlari zaxirasi yaratilib, mavjud omborlar ixtiyoriga o‘tkazildi.
Olib borilgan ana shunday tadbirlar natijasida immunoprofilaktika dasturlarining o‘z vaqtida, to‘liq ijro etilishi orqali yurtimizda nafaqat koronavirus, balki boshqa boshqariluvchi yuqumli kasalliklar bo‘yicha epidemik barqarorlikka erishilmoqda”, — deydi Nurmat Otabekov.
Eslatib o‘tamiz, O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan. Bunda birinchi navbatda koronavirus yuqish xavfi darajasi yuqori bo‘lgan shaxslar emlanadi va u faqatgina ixtiyoriylik tamoyili asosida amalga oshiriladi. O‘zbekistonda koronavirusga qarshi kurashish tadbirlari va vaksina uchun 3 trillion so‘m ajratish rejalashtirilgan. Ijtimoiy himoyaga muhtoj, yoshi katta va aholining boshqa zaif qatlamlari vakillari koronavirusga qarshi bepul emlanadi. Nurmat Otabekovning ta’kidlashicha, koronavirusga qarshi emlash punktlarida kuniga 70 kishi emlanadi.
Maxsus komissiya qaroriga ko‘ra, O‘zbekistonda Rossiyaning Gamaleya ilmiy-tadqiqot markazi tomonidan ishlab chiqilgan “Sputnik V” vaksinasini qo‘llashga ruxsat berildi.
Bosh vazir o‘rinbosari O‘zbekiston hukumati 8 ta yirik ishlab chiqaruvchiga 3 million dozadan vaksina xarid qilish bo‘yicha murojaat etganini ma’lum qildi.
Sog‘liqni saqlash vazirligi matbuot xizmatining yozishicha, 23-fevral kuni YuNISEF tomonidan Sanitariya-epidemiologik osoyishtalik va jamoat salomatligi xizmati uchun 17 ta muzlatkichli yuk mashinasi va 206 ta miniven Changan avtomobillari topshirilgan. Mashinalarning umumiy qiymati 2 million dollarni tashkil etadi. Ushbu vaksina tashishga mo‘ljallangan maxsus avtomobillar foydalanishga topshirilgan kuniyoq YTHga uchradi.
Izoh (0)