Санитария-эпидемиологик осойишталик ва жамоат саломатлиги хизмати бошлиғининг ўринбосари Нурмат Отабеков вакциналарни сақлаш, ҳудудларга етказиб бериш учун кўрилаётган тайёргарлик юзасидан маълумот берди, дея хабар бермоқда ЎзА.
«Ўтган йиллар давомида жами 21 та вакцина сақлаш омбори, шу жумладан, 1 та миллий, 14 та минтақавий ва 6 та туман омбори қурилиши қўллаб-қувватланган эди. Ҳозирги вақтда мамлакатимиз бўйича 16 та вакцина омбори қуриб битказилиб, 29 та махсус совиткич ўрнатилди. Қолган 5 та вакцина омборхонаси эса 2021 йилнинг биринчи чораги охиригача қуриб, фойдаланишга топширилиши кутилмоқда.
2021 йилнинг иккинчи чораги якунига қадар миллий омборхона ҳам қуриб битказилади. Барча омборларга ёнғин хавфсизлиги ва сигнализация тизими ўрнатилган бўлиб, улардаги мавжуд совуқликни таъминлаб бериш тизимлари замонавий генераторлар ва стабилизаторларга уланган.
Шунингдек, вакциналарни хавфсиз ва тезкор ташиш учун юртимизга жами 17 та авторефрижиратор, 206 Miniven-Labo автомашинаси келтирилди. Вилоятларга жами 34 та музхона, 10 121 дона термоконтейнер ва термосумка, 749 та музлаткич, бирламчи даволаш-профилактика муассасаларига 2 мингдан ортиқ совиткич ўрнатилган.
Барча омборлар вакциналарни юклаш-тушириш ускуналари, автокаралар ва махсус кийимлар билан таъминланди.
Бундан ташқари, ҳудудларга жами 4000 ҳарорат индикатори ва 5000 музлатиш индикатори тарқатилди. Эҳтиёт қисмлари захираси яратилиб, мавжуд омборлар ихтиёрига ўтказилди.
Олиб борилган ана шундай тадбирлар натижасида иммунопрофилактика дастурларининг ўз вақтида, тўлиқ ижро этилиши орқали юртимизда нафақат коронавирус, балки бошқа бошқарилувчи юқумли касалликлар бўйича эпидемик барқарорликка эришилмоқда», — дейди Нурмат Отабеков.
Эслатиб ўтамиз, Ўзбекистонда коронавирусга қарши эмлаш март ойининг биринчи ярмида бошланиши маълум қилинган. Бунда биринчи навбатда коронавирус юқиш хавфи даражаси юқори бўлган шахслар эмланади ва у фақатгина ихтиёрийлик тамойили асосида амалга оширилади. Ўзбекистонда коронавирусга қарши курашиш тадбирлари ва вакцина учун 3 триллион сўм ажратиш режалаштирилган. Ижтимоий ҳимояга муҳтож, ёши катта ва аҳолининг бошқа заиф қатламлари вакиллари коронавирусга қарши бепул эмланади. Нурмат Отабековнинг таъкидлашича, коронавирусга қарши эмлаш пунктларида кунига 70 киши эмланади.
Махсус комиссия қарорига кўра, Ўзбекистонда Россиянинг Гамалея илмий-тадқиқот маркази томонидан ишлаб чиқилган «Спутник V» вакцинасини қўллашга рухсат берилди.
Бош вазир ўринбосари Ўзбекистон ҳукумати 8 та йирик ишлаб чиқарувчига 3 миллион дозадан вакцина харид қилиш бўйича мурожаат этганини маълум қилди.
Соғлиқни сақлаш вазирлиги матбуот хизматининг ёзишича, 23 февраль куни ЮНИСЕФ томонидан Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та минивэн Changan автомобиллари топширилган. Машиналарнинг умумий қиймати 2 миллион долларни ташкил этади. Ушбу вакцина ташишга мўлжалланган махсус автомобиллар фойдаланишга топширилган куниёқ ЙТҲга учради.
Изоҳ (0)