Fransiyada koronavirusni yo‘q qiluvchi niqob yaratildi

Fransiyaning BioSerenity kompaniyasi koronavirusni zararsizlantiruvchi niqob yaratdi. Bu haqda BFMTV telekanali xabar berdi.

Bu niqob havo-tomchi orqali yuqadigan har qanday virusni zararsizlantirish xususiyatiga ega. Niqobdagi siklodekstrin va to‘rtlamchi ammiak molekulalarini qo‘llash orqali virusni yo‘q qiluvchi maxsus tekstil qatlam yordamida virusga qarshi kurashda samarali natijaga erishildi. Shuningdek, bu vositaning yaroqlilik muddati chegralangan bo‘lib, to‘rt soatdan ortiq ishlatilmaydi.

Ma’lumotlarga ko‘ra, bunday niqoblar 16-fevraldan sotuvga chiqarildi va uning narxi 1,49 yevroni (taxminan, 19 ming so‘m) tashkil qiladi. Kompaniyaning ta’kidlashicha, keyinchalik bu vositaning “jarrohlik versiyasi” ham chiqariladi va uning narxi 0,44 yevro (taxminan, 5600 so‘m) bo‘ladi.

Avvalroq amerikalik olimlar bir yo‘la ikkita niqob taqish koronavirusdan himoyani kuchaytirishini ma’lum qilgan edi.