Hindistonda koronavirusning Janubiy Afrika va Braziliyada paydo bo‘lgan shtammlari aniqlandi. Endilikda ushbu mamlakatlardan kelgan fuqarolar qat’iy testdan o‘tadi. Bu haqda Hindiston Sog‘liqni saqlash vazirligi ma’lumotiga tayanib, “Korrespondent.net” xabar berdi.
Vazirlik vakillarining aytishicha, koronavirusning “afrikancha” shtammi yanvar oyida to‘rt kishida qayd etilgan. Fevral oyida esa bir kishida “braziliyacha” shtamm aniqlangan.
Hindiston hukumati hozirda Buyuk Britaniyadan kelganlar singari Braziliya va Janubiy Afrikadan tashrif buyuruvchilarning barchasi uchun majburiy PZR testlarini joriy etish masalasini ko‘rib chiqmoqda. Bugungi kunga qadar Hindistonda “britancha” shtammga chalinish bo‘yicha 187 ta holat qayd etilgan.
“Janubiy Afrika yoki Braziliyadan to‘g‘ridan to‘g‘ri reyslar mavjud emas, shuning uchun Sog‘liqni saqlash vazirligi va Fuqaro aviatsiyasi vazirligi bu borada ko‘riladigan choralarni muhokama qilmoqda”, — dedi sog‘liqni saqlash vaziri Rajesh Bxushan.
Hindistonda pandemiya boshlanganidan beri 10,93 million kishi koronavirus bilan kasallangan. Mamlakat infeksiyaga chalinganlar sonining ko‘pligi bo‘yicha AQShdan keyin ikkinchi o‘rinda turadi.
2020-yilning dekabr oyida Hindiston janubidagi Eluru shahrida noma’lum kasallik tarqalgani haqida xabar berilgandi. Kasallikdan jabrlanganlar soni 800 kishidan oshgan. Bir kishi vafot etgan. Bemorlar bosh aylanishi, bosh og‘rig‘i, tutqanoq tutishidan shikoyat qilgan. Keyinchalik bunga zaharlanish sabab bo‘lgani va kasallikning COVID-19’ga aloqasi yo‘qligi aniqlangan.
Eslatib o‘tamiz, 3-yanvar kuni Hindiston koronavirusga qarshi AstraZeneca vaksinasidan foydalanishni ma’qullagan. Shuningdek, Hindiston tibbiyot dori vositalari standartini nazorat qilish tashkiloti mahalliy Bharat Biotech vaksinasini ham ma’qullashini tasdiqlagan edi.
Izoh (0)