Chechenistonda ham niqob taqmay yurishga ruxsat berildi va respublika hududiga kirish ochib qo‘yildi

Checheniston rahbari Ramzan Qodirov Telegram’dagi kanalida respublikada jamoat joylarida yurganda majburiy tartibda tibbiy niqob taqishning bekor qilingani haqida ma’lumot berdi.

Qodirov COVID-19 infeksiyasiga chalinish xavfi hanuzgacha yuqori ekanligini inobatga olgan holda kasallikni yuqtirib olish ehtimoli baland bo‘lgan kishilar va hali koronavirusga chalinmaganlarga niqob taqish tavsiya qilinishini bildirgan. Shuningdek, u koronavirusga qarshi vaksina bilan emlangandan keyin bir necha kun davomida tibbiy niqob taqqan holda yurish zarurligini eslatib o‘tgan.

Ramzan Qodirovning qo‘shimcha qilishicha, respublika hukumati mamlakat hududiga kirish borasidagi cheklovlarni ham bekor qilgan va Rossiyaning boshqa hududlarida yashovchi kishilarga nisbatan 2020-yil iyul oyidan beri qo‘yilgan Checheniston hududiga kirish taqiqi olib tashlangan.

Checheniston Udmurtiyadan keyin odamlarga tibbiy niqob taqib yurishning majburiy tartibi bekor qilingan Rossiyadagi ikkinchi hududga aylandi.

2020-yil oktabr oyida “Rospotrebnadzor” Rossiyadagi barcha federal hududlar ma’muriyatlariga jamoat joylarida niqobda yurish tartibini yanada kuchaytirishni tavsiya etgandi. Noyabr oyining ikkinchi yarmida mamlakatdagi barcha hududlarda majburiy ravishda tibbiy niqobda yurish tartibi joriy qilindi.