2021-yilning 16-fevral kuni O‘zbekiston tashqi ishlar vaziri Abdulaziz Komilov Islandiyaning favqulodda va muxtor elchisi etib tayinlangan Aurni Tor Sigurdssonni qabul qildi, deya xabar qilmoqda vazirlik matbuot xizmati.
Vazir ishonch yorliqlarini qabul qilib, elchini yuqori va mas’uliyatli lavozimga tayinlangani bilan tabrikladi hamda unga muvaffaqiyatli faoliyat tiladi.
Ta’kidlanishicha, suhbat davomida O‘zbekiston–Islandiya hamkorligining holati va istiqbollari hamda xalqaro tashkilotlar doirasidagi o‘zaro munosabatlar muhokama qilindi.
Savdo-iqtisodiy va investitsion aloqalarni rivojlantirish, jumladan, ishbilarmon doiralar o‘rtasida to‘g‘ridan to‘g‘ri aloqalarni o‘rnatish, qayta tiklanadigan energiya sohasida qo‘shma loyihalarni amalga oshirish bo‘yicha takliflar ko‘rib chiqildi.
Parlamentlararo aloqalarni, ikki tomonlama munosabatlarning huquqiy bazasini, ta’lim va kadrlar tayyorlash yo‘nalishidagi, turizm sohasidagi hamkorlikni rivojlantirishdan ikki tomon ham manfaatdor ekanligi ma’lum qilindi.
Uchrashuvda tomonlarni qiziqtirgan boshqa masalalar yuzasidan ham fikr almashildi.
Bundan avval Abdulaziz Komilov Markaziy Osiyo mamlakatlariga amaliy tashrif bilan borishi, Misrning yangi elchisini qabul qilgani hamda Moskvada bir qator xorijiy mamlakatlar elchilarining ishonch yorliqlarini qabul qilgani haqida xabar berilgandi.
Izoh (0)