O‘zbekistonda 2020-yilda qancha mansabdor korrupsiyaviy jinoyat sodir etganlik uchun jinoiy javobgarlikka tortilgani ma’lum qilindi

O‘zbekistonda 2020-yilda korrupsiyaviy jinoyat sodir etgan 1 723 nafar mansabdor shaxs jinoiy javobgarlikka tortildi. Bu haqda AOKAda o‘tkazilgan brifingda Bosh prokuratura matbuot kotibi Hayot Shamsuddinov ma’lum qildi.

Qayd etilishicha, o‘tgan yillarda ochilmay qolgan 1 125 ta jinoyat fosh etilib, qidiruvda bo‘lgan 2 446 nafar shaxs ushlangan.

Bevosita prokuratura organlari tomonidan 10 372 ta jinoyat ishi yuzasidan tergov o‘tkazilib, 6 100 nafar shaxsga nisbatan 3 903 ta jinoyat ishi sudlarga yuborilgan, jinoyat oqibatida yetkazilgan 622,2 milliard so‘mlik zarar ayblanuvchilardan undirilgan. Prokurorlar tashabbusi bilan 57 nafar shaxs oqlangan.

Xorijiy davlatlarga ayblanuvchilarni ekstraditsiya qilish haqida 194 ta iltimosnoma yuborilib, 155 nafar shaxs O‘zbekistonga etap qilingan.

Shuningdek, 2020-yilda 151 ming 266 nafar fuqaroning buzilgan huquqi tiklangan. 34 482 ta qonunga zid huquqiy hujjatlar qonunga muvofiqlashtirilgan. Aniqlangan qonun buzilishlarini bartaraf etish yuzasidan 18 988 ta taqdimnoma kiritildi, sudlarga 305 milliard so‘m zararni undirish haqida 9 779 ta ariza berildi. Prokuror tekshirishlari va dastlabki tergov davomida jami 736 milliard so‘m zarar undirilishi ta’minlangan.

Bundan tashqari, 150 mingdan ziyod ishsiz fuqaroning bandligi ta’minlanib, og‘ir ijtimoiy vaziyatga tushib qolgan 504 nafar ayolga arzon uy-joy ajratilishida amaliy yordam berilgan. 4 ming 397 nafar tadbirkorga kredit, 965 nafariga yer maydoni, 249 nafariga bino ajratilishida, 3 ming 675 nafariga kommunikatsiya tarmoqlariga ulanishida hamda 2 ming 729 nafariga litsenziya va ruxsatnomalar olishda amaliy ko‘mak berilgan.

Avvalroq O‘zbekiston korrupsiya darajasi bo‘yicha Transparency International 2020-yilgi reytingida o‘z o‘rnini 7 pog‘onaga yaxshilab, 180 ta davlat orasida 146-o‘rinni egallagani haqida xabar berilgan edi.

Adliya vaziri ishtirokida 15-fevral kuni o‘tkazilgan matbuot anjumanida Ruslanbek Davletov korrupsiya masalasi 2020-yilda ham eng ko‘p muhokama qilingan masalalardan biri bo‘lgani, jamiyatda korrupsiyaga nisbatan toqatsizlik oshib, nafrat o‘sganini aytgandi.