2021 йилнинг 16 февраль куни Ўзбекистон ташқи ишлар вазири Абдулазиз Комилов Исландиянинг фавқулодда ва мухтор элчиси этиб тайинланган Аурни Тор Сигурдссонни қабул қилди, дея хабар қилмоқда вазирлик матбуот хизмати.
Вазир ишонч ёрлиқларини қабул қилиб, элчини юқори ва масъулиятли лавозимга тайинлангани билан табриклади ҳамда унга муваффақиятли фаолият тилади.
Таъкидланишича, суҳбат давомида Ўзбекистон–Исландия ҳамкорлигининг ҳолати ва истиқболлари ҳамда халқаро ташкилотлар доирасидаги ўзаро муносабатлар муҳокама қилинди.
Савдо-иқтисодий ва инвестицион алоқаларни ривожлантириш, жумладан, ишбилармон доиралар ўртасида тўғридан-тўғри алоқаларни ўрнатиш, қайта тикланадиган энергия соҳасида қўшма лойиҳаларни амалга ошириш бўйича таклифлар кўриб чиқилди.
Парламентлараро алоқаларни, икки томонлама муносабатларнинг ҳуқуқий базасини, таълим ва кадрлар тайёрлаш йўналишидаги, туризм соҳасидаги ҳамкорликни ривожлантиришдан икки томон ҳам манфаатдор эканлиги маълум қилинди.
Учрашувда томонларни қизиқтирган бошқа масалалар юзасидан ҳам фикр алмашилди.
Бундан аввал Абдулазиз Комилов Марказий Осиё мамлакатларига амалий ташриф билан бориши, Мисрнинг янги элчисини қабул қилгани ҳамда Москвада бир қатор хорижий мамлакатлар элчиларининг ишонч ёрлиқларини қабул қилгани ҳақида хабар берилганди.
Изоҳ (0)