TIV o‘zbekistonlik talabalarning Rossiyaga kirishiga qo‘yilgan cheklov bekor qilinmagani haqida ogohlantirdi

O‘zbekiston TIV Rossiya OTMlarida tahsil oladigan talabalarga ogohlantirish bilan chiqdi.

Ma’lum qilinishicha, Rossiya iste’molchilar huquqlari va inson farovonligi himoyasi sohasida nazoratni amalga oshirish Federal xizmati saytida yangi koronavirus infeksiyasi tarqalishi xavfi saqlanib qolayotgan sharoitda aviaqatnov tiklangan mamlakatlardan kelayotgan xorijiy talabalar COVID-19’ga PZR usuli bilan ikki marta — Rossiyaga kirib kelishdan ko‘pi bilan uch kun oldin hamda Rossiyaga kirib kelgandan so‘ng 72 soat mobaynida test topshirishi haqida axborot joylashtirilgan.

Ammo vazirlik matbuot xizmatining bildirishicha, 2021-yil 16-fevral holatiga ko‘ra, Rossiya tomoni O‘zbekiston fuqarolarining mamlakatga kirib kelishlari, jumladan, o‘qish maqsadida kelishlari uchun o‘rnatilgan cheklovlarni bekor qilgani yo‘q. Rossiya hukumatining 2020-yil 16-martdagi 635-r-sonli qarorida (2021-yil 3-fevraldagi o‘zgarishlar bilan) ko‘rsatilgan shaxslar toifalari bundan mustasno.

“Shu munosabat bilan, elchixona Rossiya oliy o‘quv yurtlarida ta’lim oladigan O‘zbekiston fuqarolari ushbu mamlakatga kirishga huquqi bo‘lgan fuqarolar toifasiga kirmasligini yana bir marotaba eslatib o‘tadi”, — deyiladi TIV xabarida.

Eslatib o‘tamiz, Rossiya ta’lim va ilm-fan vazirining buyrug‘i bilan 8-fevraldan boshlab ushbu vazirlik huzuridagi oliy o‘quv yurtlarida kunduzgi o‘qish jarayoni boshlandi. 2020-yilning 13-noyabridan buyon talabalar masofaviy tarzda o‘qiyotgandi.

Rossiyada o‘qishning boshlanishi o‘zbekistonlik talablarning ushbu mamlakat hududiga kirishi uchun asos bo‘la olmasligi haqida TIV avval ham ogohlantirgandi.