Samarqand viloyatidagi Imom Buxoriy majmuasida rekonstruksiya ishlari amalga oshiriladi, deya “Daryo”ga xabar qilmoqda viloyat hokimligi matbuot xizmati.
Prezident Shavkat Mirziyoyev 11-fevral kuni Samarqandning turizm salohiyatini, shu jumladan, ziyorat turizmini rivojlantirish bo‘yicha loyihalar bilan tanishdi.
Mazkur taqdimot chog‘ida Islom olamidagi eng muqaddas qadamjolardan biri — Imom Buxoriy majmuasi va uning atrofida amalga oshiriladigan qurilish, obodonlashtirish ishlari haqida ma’lumot berildi. Davlat rahbari ushbu ziyoratgohda olib borilishi rejalashtirilgan loyiha bo‘yicha yana bir bor o‘z tavsiyalarini bildirib, mutasaddilarga zarur topshiriqlar berdi.
Imom Buxoriy majmuasida 13-fevral, shanba kuni O‘zbekiston Musulmonlari idorasi, mutasaddi vazirlik va idoralar mas’ullari, Samarqand viloyati jamoatchiligi vakillari va oqsoqollar ishtirokida loyihani amalga oshirish oldidan tadbir o‘tkazildi. Qur’on tilovat qilinib, qurbonlik amalga oshirildi.
Loyiha yuzasidan jamoatchilikka batafsil ma’lumot berildi.
Ta’kidlanishicha, majmuadagi qurilish-obodonlashtirish ishlari jarayonida Imom Buxoriy maqbarasi hozirgi ko‘rinishi saqlangan holda rekonstruksiya qilinadi. Shu paytgacha maqbara ostidagi qabrni ziyorat qilish uchun yetarli sharoit mavjud emas edi. Yangi loyihada qabr atrofi kengaytirilib, ziyoratchilar uchun har tomonlama qulaylik yaratish ko‘zda tutilgan.
Shuningdek, sakkiz ming o‘rinli masjid quriladi (Shavkat Mirziyoyev 19-noyabr kuni mamlakatda amalga oshiriladigan bunyodkorlik ishlari taqdimoti bilan tanishgan vaqtida masjid 10 ming o‘rinli bo‘lishi ma’lum qilingandi). Majmua atrofida to‘rtta ulkan minora qad rostlaydi. Hozirgi ayvonlarga qo‘shimcha ravishda ichki va tashqi ayvonlar barpo etiladi.
Mahalliy va xorijlik ziyoratchilarga qulaylik yaratish maqsadida zamonaviy mehmonxonalar, xalqaro andazalarga to‘la mos keladigan maishiy xizmat va sanitariya-gigiyena shoxobchalari quriladi.
Qayd etilishicha, majmuada qurilish ishlari jarayonida bu yerdagi tarixiy buloq va bir necha yuz yillik chinor daraxtlariga ziyon yetkazilmaydi. Ularni asrab-avaylash, o‘z holida saqlash uchun barcha zarur choralar ko‘riladi.
Majmuada amalga oshiriladigan qurilish ishlari maxsus tashkil etilgan jamg‘arma mablag‘lari hisobidan tashkil etiladi.
Bundan avval Shavkat Mirziyoyev Islom sivilizatsiyasi markazining qurilish jarayonini ko‘zdan kechirgani hamda markaz qurilishi 2021-yilning oxirida yakunlanishi haqida xabar berilgandi.
Izoh (0)