Sirdaryo viloyatida o‘ldirish bilan qo‘rqitib, tadbirkordan 45 000 AQSh dollari talab qilgan shaxslar ushlandi, deya xabar bermoqda viloyat IIB axborot xizmati.
Qayd etilishicha, viloyat hududida faoliyat ko‘rsatuvchi bir necha klinika, dorixona, issiqxona, avtomobillarga yoqilg‘i quyish shoxobchalari, tijorat do‘konlari va boshqa tarmoq savdo majmualarini o‘z ichiga olgan korxona rahbari, xususiy tadbirkor D.M. 2021-yilning 5-fevral kuni yashash manzilidan onasi K.I.ni to‘yxonaga olib borish maqsadida yo‘lga tushgan.
Tadbirkor boshqaruvidagi Malibu-2 avtomashinasi harakatlanib ketayotgan vaqtda uning oldini notanish Nexia-2 avtomashinasi to‘sib, tadbirkorga oldindan tanish bo‘lgan va muqaddam bir necha marotaba sudlangan A.E. (taxallusi “Mestniy”) o‘zining 2 nafar niqoblangan sherigi bilan D.M. bo‘yniga o‘tkir tig‘li pichoq tirab, ularga zudlik bilan 45 000 AQSh dollari miqdoridagi pullarni to‘lab berishini talab qilgan.
Ular tadbirkor bu haqda huquq tartibot idoralariga xabar qilgan taqdirda onasining guvohligida o‘ldirib ketishlari va hech narsadan qaytmasliklari haqida tahdid qilib, bir necha kun muhlat bergan.
Shundan so‘ng A.E. o‘zi singari muqaddam bir necha marotaba sudlangan R.B. (taxallusi “boksyor”) bilan birga jabrlanuvchi D.M.ning yashash manziliga borgan.
Ular talab qilingan pullardan 17 000 AQSh dollarini zudlik bilan topib berishini yoki bo‘lmasa, hozirda jazoni ijro etish muassasalarida jazoni o‘tab kelayotgan tanishlarini chiqartirishni yoxud noqonuniy giyohvand moddalari bilan muomala qilganligi uchun hozirda Sirdaryo viloyati IIB Tergov organlari ish yurituvida bo‘lgan jinoyat ishi bo‘yicha qamoqqa olingan R.B.ning qarindoshi K.B.ni har qanday yo‘llar bilan bo‘lsa-da, jinoiy javobgarlikdan chiqarib berishni talab qilib, o‘ldirish bilan tahdid qilgan.
Mazkur holat yuzasidan O‘zbekiston IIV, DXX, Sirdaryo viloyati IIB hamda DXX Sirdaryo viloyat boshqarmasi xodimlari tomonidan hamkorlikda o‘tkazilgan tezkor tadbirlar natijasida fuqarolar A.E. hamda R.B. jabrlanuvchi D.M.dan tovlamachilik yo‘li bilan talab qilingan pullardan bir qismini, ya’ni kimyoviy ishlov berilgan 10 000 AQSh dollarini olgan vaqti daliliy ashyolar bilan qo‘lga olindi.
Hozirda holat yuzasidan Sirdaryo viloyat IIB Tergov boshqarmasi tomonidan Jinoyat kodeksining 165-moddasining (tovlamachilik) tegishli qismlari bilan jinoyat ishi qo‘zg‘atilib, jinoyatchilar Jinoyat protsessual kodeksining 221-moddasi (ushlab turish) asosida ushlangan. Hozirda tergov harakatlari davom etmoqda.
Bundan avval Sirdaryoda tadbirkorlarga zo‘ravonlik qilib, ulardan ulush undirib kelgan jinoiy to‘da a’zolari, Toshkent viloyatida 55 million so‘m miqdoridagi qalbaki pullarni muomalaga kiritmoqchi bo‘lgan shaxslar hamda mazkur viloyatda giyohvand moddalarining noqonuniy savdosi bilan shug‘ullanuvchi guruh qo‘lga olingani haqida xabar berilgandi.
Izoh (0)