Farg‘ona shahrida ko‘p qavatli turar joylar o‘rtasida barcha qurilishlar to‘xtatilib, poydevor uchun qazilgan kotlovanlar ko‘miladi. Bolalar hamda sport maydonchalari qayta tiklanadi. Bu haqda viloyat hokimligi matbuot xizmati xabar berdi.
Qayd etilishicha, viloyat hokimi Xayrullo Bozorov Farg‘ona shahridagi “Do‘stlik” hamda “Gulzor” mahallalaridagi aholi yashash sharoitlarini o‘rganish jarayonida hududda ko‘p qavatli turar joylar orasida yashil maydonlar hududidagi daraxtlar kesilgani, bolalar va sport maydonchalari buzilgani va o‘rniga yangi binolar qurilishi boshlanganiga guvoh bo‘lgan.
Hududda yashovchi aholi viloyat hokimi bilan muloqot chog‘ida yangi qurilayotgan binolar sababli mahallada aholi yashashi uchun noqulayliklar tug‘ilayotganini, bolalar uchun ochiq havoda o‘ynashga, kattalar va keksalar uchun sayr qilishga imkoniyat qolmaganini bildirgan.
Viloyat hokimi birgalikda o‘rganish olib borayotgan shahar hokimi va prokuroriga 13-fevraldan boshlab Farg‘ona shahrida ko‘p qavatli turar joylar o‘rtasida olib borilayotgan barcha qurilishlarni to‘xtatish hamda bunday qurilishlarga ruxsat berish bilan bog‘liq qarorlarni bekor qilish yuzasidan topshiriq berdi.
Shu sababli poydevor uchun qazilgan kotlovanlar barchasi ko‘mib tashlanadi, qurilishi yakunlashish bosqichida bo‘lgan inshootlarning har birining qonuniyligi bo‘yicha shahar prokuraturasi o‘rganish olib boradi. Barcha hududlarda buzib tashlangan bolalar hamda sport maydonchalari qayta tiklanadi, qurilish egalari kesilgan har bir daraxt o‘rniga 100 tupdan manzarali daraxt ekishi ta’minlanadi. To‘xtatilgan qurilishlar o‘rniga tadbirkorlarga bino qurish uchun boshqa joydan yer maydoni taklif etiladi.
Xayrullo Bozorov, shuningdek, hududdagi atrof-muhit tozaligiga e’tibor berilmayotganini, chiqindilar sochilib yotgani, turar-joylar atrofida obodonlashtirish ishlarining umuman yo‘lga qo‘yilmaganini, binolarga birikkan holda vaqtinchalik qo‘shimcha inshootlar qurib tashlanganini tanqid qilgan.
“Farg‘ona turar joy massivlarida fayz bo‘lishi shart”, — degan viloyat hokimi. Shahar mahallalarini obodonlashtirish hamda ko‘kalamzorlashtirish bo‘yicha alohida manzilli dastur ishlab chiqish yuzasidan shahar hokimi Mirzohid Ubaydullayevga topshiriq bergan.
Shaharning Moturidiy ko‘chasi hududidan oqib o‘tuvchi katta ariq ustidagi obyektlar olib tashlanib, suv qirg‘og‘i bo‘ylab velosiped minish hamda sayr qilish uchun ekoyo‘lak tashkil etiladi.
Eslatib o‘tamiz, Shavkat Mirziyoyevning 3-fevraldagi farmoni bilan respublikada davlat o‘rmon fondiga kirmaydigan daraxt va butalarning qimmatbaho navlari kesilishiga joriy etilgan moratoriyning amal qilish muddati 2021-yil 31-dekabrgacha uzaytirilgan. Noqonuniy kesilgan har tup daraxt uchun 100 tup ko‘chat ekishni majburiy etish taklif etilgan.
Izoh (0)