Самарқанд вилоятидаги Имом Бухорий мажмуасида реконструкция ишлари амалга оширилади, дея «Дарё»га хабар қилмоқда вилоят ҳокимлиги матбуот хизмати.
Президент Шавкат Мирзиёев 11 февраль куни Самарқанднинг туризм салоҳиятини, шу жумладан, зиёрат туризмини ривожлантириш бўйича лойиҳалар билан танишди.
Мазкур тақдимот чоғида Ислом оламидаги энг муқаддас қадамжолардан бири — Имом Бухорий мажмуаси ва унинг атрофида амалга ошириладиган қурилиш, ободонлаштириш ишлари ҳақида маълумот берилди. Давлат раҳбари ушбу зиёратгоҳда олиб борилиши режалаштирилган лойиҳа бўйича яна бир бор ўз тавсияларини билдириб, мутасаддиларга зарур топшириқлар берди.
Имом Бухорий мажмуасида 13 февраль, шанба куни Ўзбекистон Мусулмонлари идораси, мутасадди вазирлик ва идоралар масъуллари, Самарқанд вилояти жамоатчилиги вакиллари ва оқсоқоллар иштирокида лойиҳани амалга ошириш олдидан тадбир ўтказилди. Қуръон тиловат қилиниб, қурбонлик амалга оширилди.
Лойиҳа юзасидан жамоатчиликка батафсил маълумот берилди.
Таъкидланишича, мажмуадаги қурилиш-ободонлаштириш ишлари жараёнида Имом Бухорий мақбараси ҳозирги кўриниши сақланган ҳолда реконструкция қилинади. Шу пайтгача мақбара остидаги қабрни зиёрат қилиш учун етарли шароит мавжуд эмас эди. Янги лойиҳада қабр атрофи кенгайтирилиб, зиёратчилар учун ҳар томонлама қулайлик яратиш кўзда тутилган.
Шунингдек, саккиз минг ўринли масжид қурилади (Шавкат Мирзиёев 19 ноябрь куни мамлакатда амалга ошириладиган бунёдкорлик ишлари тақдимоти билан танишган вақтида масжид 10 минг ўринли бўлиши маълум қилинганди). Мажмуа атрофида тўртта улкан минора қад ростлайди. Ҳозирги айвонларга қўшимча равишда ички ва ташқи айвонлар барпо этилади.
Маҳаллий ва хорижлик зиёратчиларга қулайлик яратиш мақсадида замонавий меҳмонхоналар, халқаро андазаларга тўла мос келадиган маиший хизмат ва санитария-гигиена шохобчалари қурилади.
Қайд этилишича, мажмуада қурилиш ишлари жараёнида бу ердаги тарихий булоқ ва бир неча юз йиллик чинор дарахтларига зиён етказилмайди. Уларни асраб-авайлаш, ўз ҳолида сақлаш учун барча зарур чоралар кўрилади.
Мажмуада амалга ошириладиган қурилиш ишлари махсус ташкил этилган жамғарма маблағлари ҳисобидан ташкил этилади.
Бундан аввал Шавкат Мирзиёев Ислом цивилизацияси марказининг қурилиш жараёнини кўздан кечиргани ҳамда марказ қурилиши 2021 йилнинг охирида якунланиши ҳақида хабар берилганди.
Изоҳ (0)