Toshkentning Sharof Rashidov, Islom Karimov va Afrosiyob ko‘chalari oralig‘ida, Markaziy univermag (“SUM”) qarshisidagi hududda O‘zbekiston mustaqilligining 30 yilligiga bag‘ishlab “Istiqlol” majmuasini barpo etish xalq orasida keng muhokamaga va noroziliklarga sabab bo‘lmoqda.
Bu masala yuzasidan 13-fevral, shanba kuni jamoatchilik vakillari bilan bo‘lib o‘tgan uchrashuvda Toshkent shahar hokimi Jahongir Ortiqxo‘jayev “Istiqlol” majmuasi mustaqillikning ramzini aks ettiruvchi stela barpo etilishini ko‘zda tutishi, boshqa hech qanday qurilish inshootlari bo‘lmasligini ma’lum qildi.
Shu yerning mahalla raisi stela qurilishini qo‘llab-quvvatlab, “SUM” qarshisidagi bog‘ himoyasi uchun 9 mingta ovoz to‘plangan bo‘lsa, ushbu obyekt barpo etilishi uchun 90 mingta ovoz to‘plash mumkinligini aytdi.
“Aytishlaricha, (bog‘ himoyasi uchun — tahr.) 9 mingta ovoz to‘planibdi. Ammo bugun-erta ushbu monument uchun 90 mingta ovoz to‘plasak, hayron qolmang. U O‘zbekiston mustaqilligi monumenti. Toshkent — O‘zbekiston poytaxti. Toshkentda rahbariyat, arxitektorlar bor, ular taklif berishdi”, — degan u.
“Mahalla raisi xalqqa demokratiya borligini ayta turib, o‘zi ham chalkashib ketdi. Uning fikricha, demokratiya bu ko‘pchilikning ozchilikka bo‘ysunishi. Aslida esa aksincha, agar ko‘pchilik qurilish uchun qarshi bo‘lsa, u to‘xtalishi kerak”, — deb yozmoqda “Podrobno.uz”.
Muloqot davomida poytaxt rahbari “Istiqlol” majmuasi quriladigan xiyobondagi ko‘p yillik daraxtlarning bir tupi ham kesilmasligini, agar shunday hol kuzatilsa, ishdan ketishga va’da berdi. Jahongir Ortiqxo‘jayev ikki yil avval xaroba holatdagi xiyobonni ta’mirlash uchun o‘z mablag‘idan 6 milliard so‘m sarflaganini ham alohida ta’kidlab o‘tgan. Shuningdek, shahar hokimligining harakatlariga ishonchsizlik bildirayotganlarga qarata, agar deputatlar uni ishdan ketishini istasa, lavozimini tark etishga tayyorligini ma’lum qildi.
Eslatib o‘tamiz, “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi.
4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (“SUM”) qarshisidagi hudud tanlangan.
Ushbu taklif jamoatchilikning keng e’tirozlariga sabab bo‘ldi. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklaridan odamlar dam olish uchun kelishini ta’kidlamoqda.
O‘zbekiston Prezidentining qizi Saida Mirziyoyeva aholining fikrini e’tiborga olmasdan, bog‘ hududlarini tubdan o‘zgartirish mumkin emasligini ma’lum qildi.
Shundan so‘ng Toshkent shahri aholisi “SUM” qarshisidagi bog‘ni himoya qilish uchun imzo yig‘ishni boshladi. 9-fevral kuni bog‘ himoyasi yo‘lida to‘plangan imzolarning birinchi qismi Prezident Xalq qabulxonasiga topshirildi.
Izoh (0)