“Real” jamoa markaziy himoyachisi Rafael Varanni sotib yuborish varianti ustida ishlamoqda.
Madridliklar klubi futbolchi borasida 50 million yevrolik taklif bo‘ladigan bo‘lsa, uni sotib yuborishga tayyor. “Yuventus” va “Inter” 27 yoshli futbolchi bilan qiziqmoqda. “Manchester Yunayted” va PSJ esa avvalroq Varanga qiziqish bildirgandi, deya xabar qilmoqda Marca.
“Real” himoyachini PSJga sotishni ma’qul ko‘rmoqda va bu orqali Kilian Mbappe transferi borasidagi muzokaralar olidan parijliklar bilan munosabatlarini mustahkamlash niyatida.
Avvalroq agar Varan madridliklar bilan amaldagi shartnomasini uzaytirmaydigan bo‘lsa, “Real” uni 2021-yilning yozidayoq sotib yuborishi mumkinligi xabar qilingandi. Fransiyalik futbolchining “Real” bilan amaldagi shartnomasi 2022-yilning yozida o‘z nihoyasiga yetadi.
Varan La Liga 2020/21-yilgi mavsumida 21 ta o‘yin o‘tkazib, ikkita gol urishga erishdi.
Eslatib o‘tamiz, “Real”ning yana bir markaziy himoyachisi Serxio Ramosning “Qirollik klubi”dagi kelajagi so‘roq ostida qolmoqda. Tomonlar 2021-yilning yozida tugaydigan kelishuvni uzaytirish borasida hamon kelishuvga erishgani yo‘q.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)