Hujumkor yarim himoyachi Sardor Rashidov faoliyatini “Paxtakor”da davom ettirishi mumkin.
Ayni vaqtda o‘zbekistonlik futbolchi “Paxtakor” mashg‘ulotlarida qatnashmoqda. “Paxtakor” matbuot xizmatining “Daryo”ga ma’lum qilishicha, futbolchi hozircha jamoa bilan birga shug‘ullanmoqda va “sherlar” bilan muzokara olib boryapti.
Rashidovning so‘nggi jamoasi “Qatar SK” klubi bo‘lib, Sardor 2019-yilda “Nasional”dan qatarliklar safiga o‘tgandi. Rashidov 2020-yilning sentabrida “Qatar SK” bilan shartnomasini uzaytirgani ma’lum qilingandi, biroq futbolchi o‘sha vaqtdan beri jamoa o‘yinlarida qatnashmadi.
Rashidov 2021-yilning 1-yanvaridan erkin agent maqomida. Transfermarkt ma’lumotlariga ko‘ra, uning transfer qiymati 850 ming yevroga teng.
Rashidov faoliyati davomida “Bunyodkor” (2010—2015), “Al-Jaish” (Qatar, 2015—2017), “Al-Jazira” (BAA, 2017-2018) va “Lokomotiv” (2018) klublarida to‘p surgan. Shuningdek, O‘zbekiston terma jamoasiga nomzod futbolchi hisoblanadi.
Shuningdek, toshkentliklar matbuot xizmati himoyachi Akrom Komilov borasidagi vaziyatga ham to‘xtalib o‘tdi. Avvalroq OKMK klubi Komilovni ijara asosida o‘z safiga qo‘shib olganini ma’lum qilgandi, biroq Akrom hamon “Paxtakor”ni tark etmagan. Ta’kidlanishicha, tomonlar hali kelishuvga erishmagan va bu borada muzokaralar olib borilmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)