«Реал» жамоа марказий ҳимоячиси Рафаэл Варанни сотиб юбориш варианти устида ишламоқда.
Мадридликлар клуби футболчи борасида 50 миллион евролик таклиф бўладиган бўлса, уни сотиб юборишга тайёр. «Ювентус» ва «Интер» 27 ёшли футболчи билан қизиқмоқда. «Манчестер Юнайтед» ва ПСЖ эса аввалроқ Варанга қизиқиш билдирганди, дея хабар қилмоқда Marca.
«Реал» ҳимоячини ПСЖга сотишни маъқул кўрмоқда ва бу орқали Килиан Мбаппе трансфери борасидаги музокаралар олидан парижликлар билан муносабатларини мустаҳкамлаш ниятида.
Аввалроқ агар Варан мадридликлар билан амалдаги шартномасини узайтирмайдиган бўлса, «Реал» уни 2021 йилнинг ёзидаёқ сотиб юбориши мумкинлиги хабар қилинганди. Франциялик футболчининг «Реал» билан амалдаги шартномаси 2022 йилнинг ёзида ўз ниҳоясига етади.
Варан Ла Лига 2020/21 йилги мавсумида 21 та ўйин ўтказиб, иккита гол уришга эришди.
Эслатиб ўтамиз, «Реал»нинг яна бир марказий ҳимоячиси Серхио Рамоснинг «Қироллик клуби»даги келажаги сўроқ остида қолмоқда. Томонлар 2021 йилнинг ёзида тугайдиган келишувни узайтириш борасида ҳамон келишувга эришгани йўқ.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)