O‘zbekiston futbol assotsiatsiyasi (O‘FA) Etika qo‘mitasining navbatdagi yig‘ilishida o‘zbek futbolida korrupsiyaga yo‘l qo‘ygan, kelishilgan o‘yinlarda qatnashgan hakam va shaxslarga nisbatan jazo choralari belgilandi.
Unga ko‘ra, O‘FA hakami Olim To‘ychiboyev O‘FA intizom kodeksining 5.44 bandiga asosan bir qator futbol o‘yinlarida uchrashuvga yoki uning natijasiga ta’sir o‘tkazish maqsadida kelishuvlarda qatnashgani uchun bir yil muddatga futbol bilan bog‘liq har qanday faoliyatdan chetlatildi.
“To‘ychiboyev ishi”da Samarqandning “Dinamo” futbol klubi vakillarining ishtiroki ham aniqlanib, ularga nisbatan tegishli jazo choralari qo‘llanildi.
Shuningdek, mazkur yig‘ilish qarori bilan Buxoro viloyati 2-liga musobaqasi ishtirokchisi “Olot Istiqlol” futbolchisi N. Hasanov “Buxoro-W” ayollar futbol klubi vakillarining ko‘rsatmalariga asosan ularni haq evaziga totalizatorda ishtirok etishga undagani uchun O‘FA intizom kodeksining qator bandlariga asosan bir yil muddatga futbol bilan bog‘liq har qanday faoliyatdan chetlashtirildi.
Mazkur qarorlar O‘FA tomonidan rasmiy e’lon qilingan kundan boshlab kuchga kirishi belgilandi.
Eslatib o‘tamiz, avvalroq O‘FA Etika qo‘mitasi FIFA hakami Sherzod Qosimovni kelishilgan o‘yinlardagi ishtiroki sabab 3 yilga futboldan chetlatgandi. Shuningdek, 2020-yilning noyabr oyida FIFA, OFK hakami Jasur Muxtorov 5 yilga, O‘FA hakami Temur To‘xtasinov bir yilga va O‘FA hakami Asker Najafaliyev esa 2020-yilgi mavsum oxirigacha futbolga oid faoliyatdan chetlatilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)