Yadro fizigi Muhsin Faxrizodaning o‘ldirilishida Eron Qurolli kuchlari a’zosi ishtirok etgan. Bu haqda Eron Razvedka vazirligi rahbari Mahmud Alaviy ma’lum qildi, deb yozmoqda “RBK”.
“Suiqasdga dastlabki tayyorgarlik ishlari bilan shug‘ullangan odam Qurolli kuchlar a’zosi edi”,— dedi Alaviy.
Alaviyning ta’kidlashicha, Razvedka vazirligi mamlakat qurolli kuchlari orasida o‘z faoliyatini olib borolmaydi. Vazirlik fizik olimga yaqinlashib kelayotgan suiqasddan xabardor bo‘lgan. Shuningdek, voqea qayerda sodir bo‘lishini ham bilgan, ammo ularga vaqti ma’lum bo‘lmagan. Qotillikdan besh kun oldin vazirlik ushbu ma’lumotni tegishli idoralarga yetkazgan, ammo jinoyatning oldini ololmagan.
Faxrizoda 2020-yil noyabr oyining oxirida Eron shimolidagi Mozandaron viloyatida o‘ldirilgandi. U ketayotgan avtomobil masofadan turib boshqariladigan katta kalibrli quroldan o‘qqa tutilgan.
Tehron qotillikda Isroilning qo‘li bor bo‘lishi mumkinligini aytgandi. Keyinchalik The New York Times (NYT) gazetasi AQSh razvedka xizmatlari ham xuddi shu fikrda ekanini xabar qilgan.
Eron Mudofaa vazirligi Faxrizodani ushbu vazirlik qoshidagi ilmiy tadqiqot va innovatsiyalar tashkiloti rahbari deb ataydi. Shu bilan birga, OAV jumladan, The Wall Street Journal, olimni “Eron bombasining otasi” deb atagan. AQSh Moliya vazirligining ma’lumotlariga ko‘ra, u yadro qurollarini ishlab chiquvchi SPND firmasini boshqargan.
Isroil bosh vaziri Benyamin Netanyaxuning so‘zlariga ko‘ra, Faxrizoda Tehronning butun yadro loyihasi rahbari bo‘lgan.
Avvalroq Eron hukumati yarim yil ichida ikkinchi sportchini qatl etgani haqida xabar berilgandi. 30 yoshli kurashchi Mehdi Ali Husayniy 2015-yilda ommaviy mushtlashuv paytida bir kishini o‘ldirishda ayblangan. Jabrlanuvchining oilasi uni afv etishdan bosh tortgani sababli Husayniyning o‘lim jazosi haqidagi hukm kuchda qolgan.
Izoh (0)