Niderlandiya hukumati koronavirus tarqalishiga qarshi kurash chorasi sifatida ilgari o‘rnatilgan komendantlik soatini uzaytirishga qaror qildi, deb yozmoqda “RBK”.
Ushbu choralar 2-martga qadar amal qiladi, 21:00 dan 04:30 gacha uzrli sababsiz ko‘chaga chiqish taqiqlanadi. Bundan tashqari, hukumat zarur mahsulotlar sotilmaydigan do‘konlar va umumiy ovqatlanish shoxobchalari faoliyatiga qo‘yilgan cheklovlarni kuchda qoldirdi.
Ta’kidlanishicha, agar virus tarqalish dinamikasi yaxshilansa, komendantlik soati 2-martdan oldinroq bekor qilinishi mumkin.
Adliya vazirligi rahbari Ferdinand Grapperxaus cheklovlarni uzaytirish qiyin choraligini aytib, iloji bo‘lsa, ularni muddatidan oldinroq bekor qilishga va’da berdi. Hukumat 23-fevral kuni komendantlik soatining epidemiologik vaziyatga ta’sirini baholaydi.
Shu bilan birga, vazir kasallikka chalinganlar sonining ortishi va yangi koronavirus shtammlarining paydo bo‘lishidan xavotirlanayotgan tibbiyot mutaxassislari komendantlik soatini uzaytirishni maslahat berganini ta’kidladi.
23-yanvardan 10-fevralga qadar o‘rnatilgan komendantlik soatining uzaytirilishi to‘g‘risida bosh vazir Mark Ryutte ham aytib o‘tgan edi. Xususan, u Britaniyada koronavirus kutilganidan tezroq tarqalayotganini ta’kidlagan. Agar shunday davom etsa, Niderlandiyada tez orada koronavirusning uchinchi to‘lqini paydo bo‘ladi, deya ogohlantirgan bosh vazir.
Eslatib o‘tamiz, 23-yanvardan Niderlandiyada butun mamlakat bo‘ylab komendantlik soati kuchga kirgach, bir qator shaharlarida, xususan, Amsterdam va Eyndxoven shaharlarida koronavirus pandemiyasi tufayli cheklovlarga qarshi norozilik namoyishlari bo‘lib o‘tgandi. Namoyishchilarga qarshi politsiya suv zambaraklari, dubinkalar va ko‘zni yoshlovchi gazdan foydalangan. Tartibsizliklar chog‘ida Amsterdamda bir nechta portlash yuz bergan.
Izoh (0)