Germaniyada rossiyalik siyosatchi Aleksey Navalniy ijaraga olgan Frayburgdagi ikki qavatli uyning egasi villa haqida lavhani tasvirga tushirgan “Rossiya 1” telekanali jurnalistlari u yerga yolg‘on gapirib kirib olganini ma’lum qildi. Bu haqda “Dojd” telekanali xabar bergan.
Ismini oshkor etishni istamagan uy egasi “Rossiya 1” telekanalining tasvirga olish guruhi a’zolari o‘zlarini belgiyalik sayyohlar deb tanishtirib, villani dam olish kunlari uchun ijaraga olgan. Lavha muallifi Anastasiya Popova Bourt fransuz familiyasidan foydalanib, villa egasini aldagan. Shuningdek, “Dojd” nashriga intervyu bergan odamning rossiyalik jurnalistlarni tanimaganligini aytib o‘tgan. Uning so‘zlariga ko‘ra, “Rossiya 1” tasvirga olish guruhi kuzatuvni yashirin kamera vositasida amalga oshirgan.
Lavha efirga ketganidan keyin uy egasi Germaniya huquq-tartibot idoralariga murojaat qilgan.
“Yashirin kamera vositasida tasvirga tushirish jinoiy javobgarlikka sabab bo‘ladigan harakatlardan biri”, — deya vaziyatga munosabat bildirgan Aleksey Navalniyning saylovchilar shtabi rahbari Leonid Volkov.
Shuningdek, Volkovning qayd etishicha, “Rossiya 1” telekanalida efirga berilgan lavhada uy ijarasining narxi ikki baravar oshirib ko‘rsatilgan.
“Ijara uchun 15 580 yevro to‘langan”, — degan Navalniyning do‘sti, tadbirkor Yevgeniy Chichvarkin.
Telekanaldagi lavhada uyni ijaraga olishga 30 ming yevrodan ko‘proq mablag‘ sarf qilingani haqida ma’lumot berilgan.
7-fevralda “Rossiya 1” telekanali “Vesti nedeli” dasturida Aleksey Navalniy yashagan Germaniyadagi villa haqida lavha efirga berilgan. Jurnalist Anastasiya Popova mazkur uyda hashamatli ikkita yotoqxona borligi, kofe tayyorlaydigan mashinali oshxona va changyutgichli tozalash xonasi mavjudligini ta’kidlagandi.
Undan oldin Aleksey Navalniyning Korrupsiyaga qarshi kurash fondi tomonidan e’lon qilingan “Putin uchun qurilgan qasr” surishtiruvida Gelenjik yaqinida Idokopos burnidagi Praskoveyevka qishlog‘ida kamida 100 milliard rubllik qasr joylashgani, u Rossiya prezidenti uchun davlat va xususiy kompaniyalar pullariga qurilgani, u yer uchish taqiqlangan hudud ekanligi, shuningdek, qasrga dengiz tomondan suzib borib ham bo‘lmasligi bayon etilgandi. Putin ushbu surishtiruvdan keyin Korrupsiyaga qarshi kurash fondi (KKF) tomonidan tilga olingan Gelenjikdagi qasrga na u va na uning qarindoshlari egalik qilishini bildirgan.
Izoh (0)