Ядро физиги Муҳсин Фахризоданинг ўлдирилишида Эрон Қуролли кучлари аъзоси иштирок этган. Бу ҳақда Эрон Разведка вазирлиги раҳбари Маҳмуд Алавий маълум қилди, деб ёзмоқда «РБК».
«Суиқасдга дастлабки тайёргарлик ишлари билан шуғулланган одам Қуролли кучлар аъзоси эди»,— деди Алавий.
Алавийнинг таъкидлашича, Разведка вазирлиги мамлакат қуролли кучлари орасида ўз фаолиятини олиб боролмайди. Вазирлик физик олимга яқинлашиб келаётган суиқасддан хабардор бўлган. Шунингдек, воқеа қаерда содир бўлишини ҳам билган, аммо уларга вақти маълум бўлмаган. Қотилликдан беш кун олдин вазирлик ушбу маълумотни тегишли идораларга етказган, аммо жиноятнинг олдини ололмаган.
Фахризода 2020 йил ноябрь ойининг охирида Эрон шимолидаги Мозандарон вилоятида ўлдирилганди. У кетаётган автомобиль масофадан туриб бошқариладиган катта калибрли қуролдан ўққа тутилган.
Теҳрон қотилликда Исроилнинг қўли бор бўлиши мумкинлигини айтганди. Кейинчалик The New York Times (NYT) газетаси АҚШ разведка хизматлари ҳам худди шу фикрда эканини хабар қилган.
Эрон Мудофаа вазирлиги Фахризодани ушбу вазирлик қошидаги илмий тадқиқот ва инновациялар ташкилоти раҳбари деб атайди. Шу билан бирга, ОАВ жумладан, The Wall Street Journal, олимни «Эрон бомбасининг отаси» деб атаган. АҚШ Молия вазирлигининг маълумотларига кўра, у ядро қуролларини ишлаб чиқувчи SPND фирмасини бошқарган.
Исроил бош вазири Бенямин Нетаньяхунинг сўзларига кўра, Фахризода Теҳроннинг бутун ядро лойиҳаси раҳбари бўлган.
Аввалроқ Эрон ҳукумати ярим йил ичида иккинчи спортчини қатл этгани ҳақида хабар берилганди. 30 ёшли курашчи Меҳди Али Ҳусайний 2015 йилда оммавий муштлашув пайтида бир кишини ўлдиришда айбланган. Жабрланувчининг оиласи уни афв этишдан бош тортгани сабабли Ҳусайнийнинг ўлим жазоси ҳақидаги ҳукм кучда қолган.
Изоҳ (0)