Germaniya, Shvetsiya va Polsha o‘z diplomatlarining Rossiyadan chiqarib yuborilishiga javoban, bir nafardan Rossiya diplomatlarini o‘z hududlaridan haydab chiqardi, deb yozadi Meduza.
Germaniya va Shvetsiya Berlin va Stokgolmdagi elchixonalar xodimlarini, Polsha esa Poznandagi bosh konsulxona xodimini persona non grata deb e’lon qildi.
Uchala mamlakat tashqi siyosiy muassasalari o‘z qarorlarini deyarli bir vaqtda e’lon qildi.
Rossiya Tashqi ishlar vazirligi esa uch mamlakat qarorini “dushmanlarcha siyosat” deb atadi.
Rossiya TIV 5-fevral kuni Peterburgdagi Shvetsiya va Polsha bosh konsulxonalari xodimlaridan, shuningdek, Moskvadagi Germaniya elchixonasi xodimidan mamlakatni tark etishni talab qilgan edi. Idora ma’lumotlariga ko‘ra, ular 23-yanvar kuni siyosatchi Aleksey Navalniy tarafdorlarining aksiyalarida qatnashgan. Shvetsiya uning diplomati shunchaki aksiyani kuzatganini, “bu standart diplomatik jarayon hisoblanishi”ni ma’lum qildi.
2-fevral kuni 20 ga yaqin G‘arb diplomatlari Navalniyga nisbatan shartli muddatni haqiqiysiga o‘zgartirish haqidagi masala ko‘rib chiqilayotgan sud binosiga kelgan edi. Rossiya TIV buni ichki ishlarga aralashuv deb atadi; Buyuk Britaniyaning Rossiyadagi elchixonasida esa bu “odatiy amaliyot” deb ataldi.
Izoh (0)