Janubiy Afrika Respublikasi (JAR)da keng tarqalayotgan COVID-19’ning “afrikacha” variantidan eng past darajada himoya qilishi aniqlanganidan keyin hukumat AstraZeneca vaksinadan foydalanishni vaqtincha to‘xtatdi. Bu haqda “Interfaks” xabar berdi.
Mamlakat sog‘liqni saqlash vaziri Zveli Mkxize 7-fevral, yakshanba kungi matbuot anjumanida ta’kidlashicha, hukumat olingan natijalar asosida olimlarning AstraZeneca vaksinasi bilan qanday ish tutish kerakligi haqida keyingi maslahatlarini kutadi.
AstraZeneca kompaniyasi vaksinaning “afrikacha” shtammga qarshi samaradorligini oshirish ustidagi ishlarini davom ettiradi, deydi vaksina yaratilishiga boshchilik qilgan Oksford universiteti xodimi Sara Gilbert.
“Texnologiyani moslashtirish oson. Bizningcha, vaksinaning yangi versiyasi ‘afrikancha’ shtammni tanuvchi antitanalar hosil qiladi, keyin bu jarayon grippga qarshi emlashdek bo‘ladi” — izoh berdi mutaxassis.
Gilbertning so‘zlariga ko‘ra, vaksinaning yangi varianti kuz mavsumiga tayyor bo‘lishi mumkin.
JAR vaksinaning 1 million dozasini olgan va bu hafta emlash jarayoni boshlanishi kerak edi.
Vazirning ma’lumot berishicha, yaqin haftalarda hukumat Johnson & Johnson va Pfizer kompaniyalari tomonidan ishlab chiqarilgan vaksinalarni taklif qiladi.
Avvalroq JARning Vitvatersrand va Oksford universitetlari mutaxassislari mamlakatda vaksina ustida klinik tadqiqotlar o‘tkazdi, unda 2 mingdan ortiq odam qatnashdi.
“Afsuski, AstraZeneca vaksinasi yengil va o‘rta darajadagi kasalliklarga qarshi ish bermaydi”, — dedi tadqiqot boshqaruvchisi, professor Shabir Madhi brifingda.
Shuningdek, professorning ta’kidlashicha, tadqiqot vaksinaning kasallikdagi jiddiy holatlarga qarshi kurasha olishda samaradorligini namoyish etolmadi, chunki ishtirokchilar o‘rtacha 31 yosh edi, shu sababli virusning og‘ir alomatlari xavfi yuqori bo‘lgan demografik xususiyatlarga ega bo‘lmagan.
Sara Gilbertning aytishicha, AstraZeneca vaksinasi virusning og‘ir formasi uchun samarali bo‘lib qolaveradi. Shunigdek, vaksina “afrikacha” shtamm tarqalishiga to‘sqinlik qila olmasa-da, o‘lim holatlari, gospitalizatsiya va kasalning og‘ir holatlari sonini qisqartiradi.
JARda yangi shtamm birinchi bor 2020-yilning oxirida ro‘yxatga olindi. Olimlarning ta’kidlashicha, bu shtamm avvalgisiga qaraganda 50 foizga yuqumliroq, inson hujayralariga oson kirib boradi va ularga qattiqroq yopishadi. Koronavirusga qarshi ishlab chiqarilgan vaksinalar yangi shtammga nisbatan samarasiz bo‘lishi mumkin, deb ogohlantirdi Yoxannesburg Sog‘liqni saqlash milliy xizmati laboratoriyasi mutaxassislari.
Izoh (0)