AQShda koronavirusning “afrikacha” shtammi aniqlandi

AQSh tibbiyot xizmati mamlakatda COVID-19’ning Janubiy Afrikada paydo bo‘lgan shtammini yuqtirish bo‘yicha dastlabki ikki holat aniqlangani haqida xabar berdi, deb yozmoqda “Interfaks”.

Koronavirusning ushbu yuqumliroq turi Janubiy Karolinadagi ikki nafar bemorda aniqlangan. Biroq mazkur bemorlarning Qo‘shma Shtatlar tashqarisiga sayohat qilgani ma’lum emas, deyiladi xabarda.

Ta’kidlanishicha, “afrikacha” shtammning o‘lim darajasi qanchalik yuqoriligi haqida hech qanday dalil bo‘lmasa-da, COVID-19’ga qarshi vaksinaning mazkur turdagi virusga ta’siri kuchsizroq. Shu bilan birga, Pfizer va Moderna vaksinalarini ishlab chiqaruvchi kompaniyalar o‘zlarining dori-darmonlari ushbu shtammga qarshi samarali ekaniga ishontirgan.

Avvalroq Qo‘shma Shtatlarda koronavirusning yuqumlilik darajasi yuqoriroq bo‘lgan “britancha” shtammi aniqlangan edi.

AQShda pandemiya boshlangandan buyon 26 million kishida COVID-19 qayd etilgan, 440 mingdan ortiq kishi virus qurboniga aylangan.

Qo‘shma Shtatlarda virusga chalinish holatining kamayishi kuzatilmoqda. Ammo AQSh prezidentining tibbiyot bo‘yicha maslahatchisi doktor Entoni Fauchi COVID-19’ning “afrikacha” shtammini “haqiqatan ham muammo bo‘lishi mumkin”, deya xavotir bildirdi.

Ma’lumot uchun, olimlar koronavirusning “afrikacha” shtammi antitanalarga bardoshli ekanligini aniqlagan.

Avvalroq Janubiy Afrika olimlari koronavirusning yangi shtammi yuqori darajada yuqumliligini isbotlagani, Daniyada ham koronavirusning “afrikacha” shtammi aniqlangani haqida xabar berilgandi.