Qirg‘izistonning birinchi prezidenti Asqar Akayev va uning oilasi to‘ng‘ich o‘g‘li Aydar Akayevning vafotiga bir yil to‘lishi munosabati bilan uning qabrini ziyorat qildi. Qabr ustiga qabrtosh o‘rnatildi, deb yozmoqda Kloop.
Aydar Akayev otasi hukmronligi davrida moliya vaziri maslahatchisi bo‘lib ishlagan va parlament a’zosi bo‘lgan. Biroq 2005-yilgi inqilob va Asqar Akayevning hokimiyatdan ag‘darilishidan so‘ng, u hukumatdagi lavozim va barcha vakolatlaridan mahrum qilingan.
O‘shanda Bosh prokuratura unga qarshi davlat mablag‘larini talon-toroj qilish, moliyaviy firibgarlik va o‘zgalarning mol-mulkini noqonuniy o‘zlashtirganlik ayblovi bilan jinoiy ish qo‘zg‘atgan edi.
Asqar Akayev inqilobdan keyin rafiqasi va bolalari bilan Moskvaga jo‘nab ketgandi, to‘ng‘ich o‘g‘li u yerda tadbirkorlik bilan shug‘ullangan. Rossiyada u Moskva g‘arbidagi elita hudud— “Rublyovka”da yashagan.
2020-yil 6-fevral kuni Aydar Akayevning vafot etgani ma’lum bo‘lgan. Rossiya OAVlari “Rublyovka”dagi uydan Akayevning jasadi topilgani haqida xabar tarqatgan. Keyinchalik oilaviy advokati Ikromiddin Aytqulovning aytishicha, Aydar Akayev 44 yoshga to‘lishidan atigi ikki hafta oldin yurak xastaligi sababli vafot etgan.
Avvalroq Qirg‘iziston Milliy xavfsizlik xizmati rahbari Kamchibek Tashiyev davolanish uchun xorijga ketayotganini ma’lum qilgandi. Amaldorda yurak bilan bog‘liq muammolar kuzatilgan.
Eslatib o‘tamiz, 2021-yil 3-fevralda Qirg‘iziston parlamenti 41 yoshli Ulug‘bek Maripov nomzodini bosh vazir lavozimiga tasdiqlagan. Ulug‘bek Maripov bosh vazirlik kursisiga o‘tirganidan keyin o‘zining qondosh ukasi Baxitbek Maripovni O‘sh viloyatining Novqat tumani hokimligi lavozimidan chetlatgan.
Izoh (0)