Qozog‘istonda yaqin kunlarda havo -30 darajagacha sovib ketishi mumkin

Qozog‘istonda yaqin kunlarda 30 darajagacha sovuq bo‘lishi kutilmoqda, deb xabar beradi Tengrinews mamlakat gidrometeorologiya xizmatiga tayanib.

Ma’lum qilinishicha, 9—11-fevral kunlari Qozog‘iston hududining katta qismi Skandinaviya tumanlaridan keladigan sovuq antisiklon ta’siri ostida bo‘ladi, natijada havo harorati 23-30 darajagacha, mamlakat sharqida esa 28-33 darajagacha tushib ketishi kutilmoqda.

G‘arbiy hududlarga esa Atlantika tomonidan keladigan navbatdagi siklon o‘z ta’sirini o‘tkazadi, yog‘ingarchilik (yomg‘ir, qor), muzlama, tuman bo‘lishi, shuningdek, havo harorati ko‘tarilishi kuzatiladi.

Ayni paytda Yevropada ham sovuq havo hukm surib, kuchli qor bo‘ronlari kuzatilmoqda. Xususan, Germaniya va Niderlandiyada kuchli qor tufayli transport harakati to‘xtab qolgan.

So‘nggi kunlarda O‘zbekistonda esa bahoriy iliq ob-havo kuzatilmoqda. “O‘zgidromet” xabariga ko‘ra, 9-fevral kuni ham havo iliq bo‘lib, ba’zi hududlarda biroz yomg‘ir yog‘ishi mumkin.