Jahon sog‘liqni saqlash tashkiloti (JSST) vaksinatsiya bo‘limi rahbari Keyt O’Brayenning ta’kidlashicha, koronavirusga qarshi vaksinatsiya bepushtlikka olib kelishi mumkin emas, bu shunchaki mish-mish, deya xabar berdi “RBK”.
Uning so‘zlariga ko‘ra, turli vaksinalar atrofida mazkur mish-mishlar tarqalmoqda, ammo ular haqiqatdan yiroq. “Bepushtlikni keltirib chiqaradigan birorta vaksina yo‘q”, — dedi O’Brayen.
2020-yil iyun oyida Rossiya Sog‘liqni saqlash vazirligining bolalar va o‘smirlar uchun bosh mutaxassis-ginekologi Yelena Uvarova COVID-19 bilan kasallangan erkaklarda bepushtlik istisno qilinmasligini aytgan. “Hozirda ushbu boshdan o‘tkazilgan COVID-19 infeksiyasi sperma sifatini 38 foizga pasaytirayotgani kuzatilmoqda”, — degan u.
Keyinchalik, Rossiya sog‘liqni saqlash vaziri Mixail Murashko, koronavirus infeksiyasi bepushtlikka olib kelishi mumkinligi haqida aniq aytib bo‘lmasligini ta’kidlagan. Uning so‘zlariga ko‘ra, “koronavirus infeksiyasi paytida patogenlar aniqlanib, yallig‘lanish kasalliklari paydo bo‘lishi haqida ayrim fikrlar chop etildi”, ammo bu haqda hali ishonchli ma’lumotlar yo‘q.
Avvalroq COVID-19’ni so‘lak orqali aniqlaydigan birinchi testni ishlab chiqishga rahbarlik qilgan va pandemiyaga qarshi kurashda muhim rol o‘ynagan tadqiqotchi Endryu Bruk kutilmaganda vafot etgani haqida xabar berilgandi. 51 yoshli olimning o‘limiga yurak xuruji sabab bo‘lgan.
Britaniyalik yigit Neten Kammings esa 2020-yilda saraton, meningit, sepsis va koronavirusni yengishga muvaffaq bo‘lgan. U 2020-yilni “jahannam yili” deb atagan.
Izoh (0)