Жанубий Африка Республикаси (ЖАР)да кенг тарқалаётган COVID-19’нинг «африкача» вариантидан энг паст даражада ҳимоя қилиши аниқланганидан кейин ҳукумат AstraZeneca вакцинадан фойдаланишни вақтинча тўхтатди. Бу ҳақда «Интерфакс» хабар берди.
Мамлакат соғлиқни сақлаш вазири Звели Мкхизе 7 февраль, якшанба кунги матбуот анжуманида таъкидлашича, ҳукумат олинган натижалар асосида олимларнинг AstraZeneca вакцинаси билан қандай иш тутиш кераклиги ҳақида кейинги маслаҳатларини кутади.
AstraZeneca компанияси вакцинанинг «африкача» штаммга қарши самарадорлигини ошириш устидаги ишларини давом эттиради, дейди вакцина яратилишига бошчилик қилган Оксфорд университети ходими Сара Гильберт.
«Технологияни мослаштириш осон. Бизнингча, вакцинанинг янги версияси ‘африканча’ штаммни танувчи антитаналар ҳосил қилади, кейин бу жараён гриппга қарши эмлашдек бўлади» — изоҳ берди мутахассис.
Гильбертнинг сўзларига кўра, вакцинанинг янги варианти куз мавсумига тайёр бўлиши мумкин.
ЖАР вакцинанинг 1 миллион дозасини олган ва бу ҳафта эмлаш жараёни бошланиши керак эди.
Вазирнинг маълумот беришича, яқин ҳафталарда ҳукумат Johnson & Johnson ва Pfizer компаниялари томонидан ишлаб чиқарилган вакциналарни таклиф қилади.
Аввалроқ ЖАРнинг Витватерсранд ва Оксфорд университетлари мутахассислари мамлакатда вакцина устида клиник тадқиқотлар ўтказди, унда 2 мингдан ортиқ одам қатнашди.
«Афсуски, AstraZeneca вакцинаси енгил ва ўрта даражадаги касалликларга қарши иш бермайди», — деди тадқиқот бошқарувчиси, профессор Шабир Мадҳи брифингда.
Шунингдек, профессорнинг таъкидлашича, тадқиқот вакцинанинг касалликдаги жиддий ҳолатларга қарши кураша олишда самарадорлигини намойиш этолмади, чунки иштирокчилар ўртача 31 ёш эди, шу сабабли вируснинг оғир аломатлари хавфи юқори бўлган демографик хусусиятларга эга бўлмаган.
Сара Гильбертнинг айтишича, AstraZeneca вакцинаси вируснинг оғир формаси учун самарали бўлиб қолаверади. Шунигдек, вакцина «африкача» штамм тарқалишига тўсқинлик қила олмаса-да, ўлим ҳолатлари, госпитализация ва касалнинг оғир ҳолатлари сонини қисқартиради.
ЖАРда янги штамм биринчи бор 2020 йилнинг охирида рўйхатга олинди. Олимларнинг таъкидлашича, бу штамм аввалгисига қараганда 50 фоизга юқумлироқ, инсон ҳужайраларига осон кириб боради ва уларга қаттиқроқ ёпишади. Коронавирусга қарши ишлаб чиқарилган вакциналар янги штаммга нисбатан самарасиз бўлиши мумкин, деб огоҳлантирди Йоханнесбург Соғлиқни сақлаш миллий хизмати лабораторияси мутахассислари.
Изоҳ (0)