Xalq deputatlari Chinoz tumani kengashining navbatdan tashqari sessiyasi bo‘lib o‘tdi, deya xabar qilmoqda Toshkent viloyati matbuot xizmati.
Ta’kidlanishicha, sessiya kun tartibida tashkiliy masala ko‘rib chiqilgan. Xususan, tuman hokimi vazifasida ishlagan Akmalxon Ma’diyev lavozimidan ozod qilindi.
Uning o‘rniga Alimbekov Botir Bahodirovich nomzodi Chinoz tumani hokimi lavozimiga tavsiya qilingan.
Sessiyada Toshkent viloyati hokimi vazifasini bajaruvchi Davron Hidoyatov ishtirok etgan va kun tartibidagi masala yuzasidan nutq so‘zlagan.
Xalq deputatlari tuman kengashining qarori bilan Botir Alimbekov Chinoz tumani hokimi lavozimiga tasdiqlangan.
Bundan avval Olmazor tumani hokimi Baxtiyor Rahmonov Toshkent shahri hokimining birinchi o‘rinbosari etib tayinlangani, Toshkent viloyati hokimi Rustam Xolmatov ishdan olinib uning o‘rniga Davron Hidoyatov viloyat hokimi vazifasini bajaruvchi etib tayinlangani, Jismoniy tarbiya va sport vaziri Dilmurod Nabiyev lavozimidan ozod etilgani hamda Toshkent viloyati hokimining birinchi o‘rinbosari etib Ulug‘bek Uzoqov tayinlangani haqida xabar berilgandi.
Izoh (0)