O‘zbekistonda 2020-yilda noqonuniy daraxt kesilishi bilan bog‘liq jami 3 960 ta huquqbuzarlik aniqlangan. Bu haqda Davlat ekologiya qo‘mitasi axborot xizmati rahbari Bunyod Abdullayev AOKAda bo‘lib o‘tgan brifingda ma’lum qildi.
Ma’lum qilinishicha, 2020-yil davomida o‘tkazilgan davlat ekologik nazorati natijalariga ko‘ra daraxt va butalarni noqonuniy kesilishi bilan bog‘liq jami 3 960 ta huquqbuzarlik sodir etilgan. Noqonuniy daraxtkesarlarning 136 nafari mansabdor shaxs ekani aniqlangan.
Huquqbuzarlarga jami 4 milliard 578 million so‘m jarima solingan, o‘simlik dunyosiga yetkazilgan zarar miqdori esa — 15 milliard 305 million so‘mni tashkil etmoqda.
“18 ta holat bo‘yicha qonunbuzarlik sodir etgan shaxslarga nisbatan jinoiy ish qo‘zg‘atilgan. Huquqbuzarlardan 127 ta qurol-aslahalar ashyoviy dalil sifatida olib qo‘yilgan”, — dedi qo‘mita vakili.
Ta’kidlanishicha, 2 724 metr kub buta, 7 812 dona daraxt shundan, 3 428 dona qimmatli va 4 384 dona kamyob va qimmatbaho daraxt noqonuniy ravishda kesilgan.
Avvalroq Qarshi hokimiyati sanoat zonasi qurish uchun deyarli 2900 tup daraxtni kesib tashlagani, Jahongir Ortiqxo‘jayev poytaxtda 30 mlrd so‘mga daraxt ekishni taklif qilgani hamda O‘zbekistonda noqonuniy kesilgan har tup daraxt uchun 100 tup ko‘chat ekishni majburiy etish taklif qilingani haqida xabar berilgandi.
Izoh (0)