Qonuniy kuchga kirmagan ish yuzasidan OAVga ma’lumot bergan sudyaga intizomiy chora ko‘riladi – Sudyalar oliy kengashi sudyalarni ogohlantirdi

Qonuniy kuchga kirmagan hukm yoki qaror yuzasidan ommaviy axborot vositasi xodimiga intervyu bergan sudyaga nisbatan intizomiy chora ko‘riladi. Bu haqda O‘zbekiston Sudyalar oliy kengashi matbuot xizmati rahbari Tursunali Akbarov “Daryo”ga ma’lum qildi.

Xabarda aytilishicha, yanvar oyida jinoyat ishlari bo‘yicha Quva tuman sudi raisi o‘zi ko‘rib chiqqan, biroq hali qonuniy kuchga kirmagan jinoyat ishi bo‘yicha markaziy telekanallardan biriga intervyu bergan.

“Quva tuman sudi raisi qayd etilgan huquqiy hujjatlar talabiga rioya etmagani uchun Sudyalar oliy kengashi qarori bilan unga nisbatan intizomiy jazo qo‘llashga rozilik berildi”, – deyiladi Sudyalar oliy kengashi axborotida.

Ma’lumot uchun, “Sudyalarning odob-axloq kodeksi”ning 14-moddasiga ko‘ra, sudya hali qonuniy kuchga kirmagan sud hukmi (qarori) bo‘yicha ommaviy axborot vositalarida chiqish qilishga haqli emasligi qayd etilgan. Ayni tartib Oliy sud Plenumi qarorida ham ko‘rsatib o‘tilgan. Zero, sudning qonuniy kuchga kirmagan hukmi (qarori) bo‘yicha ommaviy axborot vositalarida bong urish aybsizlik prezumpsiyasiga zid hisoblanadi.

Bunday hollarda sudyaga nisbatan intizomiy jazo chorasi Sudyalar oliy kengashi roziligi bilan tegishli malaka hay’ati tomonidan qo‘llaniladi.

Ochiq sud majlislarida ko‘rib chiqilgan sud hujjatlari qonuniy kuchga kirganidan so‘ng ommaviy axborot vositalarida chiqish qilishga hech qanday monelik yo‘q.

Eslatib o‘tamiz, 2020-yilning 8-sentabr kuni Toshkent viloyati bosh infeksionisti Guljahon Yo‘ldoshevaga nisbatan Jinoyat kodeksining 167-moddasi 3-qismi “a” bandi (o‘zlashtirish yoki rastrata yo‘li bilan talon-toroj qilish, juda ko‘p miqdorda) hamda 207-moddasi 3-qismi “a” bandi (mansabga sovuqqonlik bilan qarash odam o‘lishiga sabab bo‘lsa) bilan ayblanuvchi tariqasida ishga jalb qilingan edi. Oradan 5 kun o‘tganidan so‘ng – 13-sentabrda Chirchiq shahar prokurori Baxtiyor Ibrohimov OAVda tergovga qadar tekshiruv ishlari yakun topmagan, aybi hali to‘liq isbotlanmagan Guljahon Yo‘ldoshevaning ayblilik masalasiga keskin munosabat bildirgandi. Bu bilan u aybsizlik prezumpsiyasiga amal qilmagan.

Aksiga olib, Guljahon Yo‘ldoshevani sudgacha aybdorga chiqargan Chirchiq shahri prokurori Bosh prokuraturaga ishga o‘tgan.