YuNISEF O‘zbekistonga ijtimoiy himoyani mustahkamlash uchun uskunalar sovg‘a qildi

Moliya vazirligida 2021-yil 29-yanvar kuni O‘zbekistonda ijtimoiy himoyani mustahkamlashga bag‘ishlangan yig‘ilish bo‘lib o‘tdi va unda Moliya vaziri o‘rinbosari Ahadbek Haydarov va YuNISEFning O‘zbekistondagi vakili Munir Mammadzoda ishtirok etdi. Bu haqda vazirlik matbuot xizmati “Daryo”ga xabar qildi.

Ta’kidlanishicha, O‘zbekiston YuNISEF bilan birgalikda ijtimoiy himoya dasturlarini, jumladan, koronavirus pandemiyasi kabi inqirozlar oqibatlarini oldini olishga qaratilgan ijtimoiy yordam dasturlarini yanada kengroq boshqaradigan yagona reyestrning axborot tizimini takomillashtirish ustida ish olib bormoqda.

Moliya vazirligi va YuNISEF o‘rtasidagi texnik yordam doirasida O‘zbekiston Respublikasi Moliya vazirligi huzuridagi budjetdan tashqari pensiya jamg‘armasiga 300 donadan ortiq ofis jihozlari topshirildi. Bular ijtimoiy himoyaning yagona reyestri, ijtimoiy nafaqalarni elektron tarqatish jarayonini optimallashtirish imkonini beruvchi axborot tizimi ishini takomillashtirish uchun foydalaniladi.

Ma’lum qilinishicha, o‘tkazilgan jihozlar bo‘linmalari O‘zbekistonning barcha hududlaridagi budjetdan tashqari pensiya jamg‘armasining tuman va shahar ofislari o‘rtasida taqsimlanadi, shu tariqa tizimga teng kirishni ta’minlash hamda butun mamlakat bo‘ylab dastur jarayonlarini takomillashtirish imkonini beradi.

Moliya vaziri o‘rinbosari Ahadbek Haydarov YuNISEF bilan hamkorlik O‘zbekistonda ijtimoiy himoya tizimini rivojlantirish va takomillashtirish jarayonida muhim nuqtalardan biri ekanini ta’kidladi. Ushbu dasturning maqsadi – milliy rivojlanish strategiyasini, jumladan, Barqaror rivojlanish maqsadlarini moliyalashtirishning umumiy tizimini mustahkamlashga ko‘maklashish ekani aytildi.

Xalqaro tajriba va salohiyatga ega YuNISEF O‘zbekiston hukumatiga barcha aholi uchun mavjud bo‘lgan keng qamrovli ijtimoiy ta’minot tizimini yaratishda muhim yordam beradi va shu bilan inson kapitalining yanada inklyuziv iqtisodiy o‘sishi va rivojlanishiga hissa qo‘shadi va barqaror rivojlanishga erishishni tezlashtiradi.

“Biz ushbu uskunalarni Moliya vazirligiga topshirishdan mamnunmiz va muhtoj oilalarga hamda bolalarga naqd pul yordamini adolatli taqsimlashni samarali boshqarishga olib keladigan yagona reyestrning faoliyatini kengaytirishga yordam beramiz.

Darhaqiqat, birgalikdagi sa’y-harakatlarimiz, shu jumladan, Yagona reyestrni doimiy qo‘llab-quvvatlashimiz milliy ijtimoiy himoya tizimining hisobdorligi va shaffofligini oshirishga, qamrov va samaradorlikni oshirishga olib keladi deb o‘ylaymiz”, – dedi YuNISEFning O‘zbekistondagi vakili Munir Mammadzoda.

Ijtimoiy himoya yagona reyestri dastlab 2019-yilda Sirdaryo viloyatida ishga tushirildi. 2020-yilning oxiriga qadar mamlakatning barcha hududlarida ro‘yxatga olish kitobi joylashtirildi. Hozirda Yagona reyestrda kam ta’minlangan, bolali oilalar uchun ijtimoiy nafaqalar qamrab olingan.

Uchrashuv yakunida tomonlar ijtimoiy himoya dasturlarini takomillashtirish va yana-da qo‘llab-quvvatlashda Moliya vazirligi va YuNISEF o‘rtasidagi hamkorlik hamda O‘zbekistonda yagona reyestrning muhim o‘rni va ahamiyatini qayd etdi.

Avvalroq YuNISEF O‘zbekiston hukumatining bolalarni maktabga qaytarish haqidagi qarorini ma’qullagani haqida xabar berilgandi.