“Yeb ketilgani” aytilgan saxovat pulining 60 mln so‘mi qashqadaryolik ayollarga qaytariladigan bo‘ldi

Qashqadaryo viloyatining Qarshi tumanida muhtoj ayollarga berilgan 100 million so‘m saxovat pulining 60 million so‘mi murojaatchi ayollarga qaytariladigan bo‘ldi. Bu haqda Qarshi shahridagi Jurnalistlar uyida Qarshi tumani hokimi Maqsuda Mustafoyeva ma’lum qildi, deya xabar berdi “Daryo” muxbiri.

Ma’lum bo‘lishicha, 30-yanvar kuni Qarshi shahridagi Jurnalistlar uyida toshkentlik tadbirkor Adham Berdiyev tomonidan saxovat qilingan 100 million so‘m pulni oldi bo‘lib, televideniyega tasvirga tushib bergan, ammo mablag‘ga ega chiqolmagan ayollar masalasida Qarshi tumani hokimi Maqsuda Mustafoyeva jamoatchilikka izoh bergan.

“Haqiqatan ham besh nafar ayolga uy qurib berish uchun 20 million so‘mdan 100 million so‘m ajratilgandi. Biroq Qovchin qishlog‘i hududidagi 3 ta uyning poydevorini qurib bo‘lganimizdan so‘ng, 20 million so‘mga uy qurolmasligimizni bildik. Va keyingi variantimiz, ya’ni bo‘sh turgan binolarni ta’mirlab yashash uchun imkoniyat qilib berishni tanladik. Hamda besh nafar ayolga sharoit yaratib berdik”, — dedi tuman hokimi.

Matbuot brifingida so‘z olgan “Daryo” muxbiri hokimga yuzlanib, “20 million so‘mga uy qurib bo‘lmaydi, buni keyin tushunib yetdik deyapsiz. Va’da berishdan oldin 20 million so‘mga uy qurib bo‘lmasligiga tuman mas’ullarining aqli yetmaganmi? Yoki va’da shunchakimidi?”, degan savolni berdi. Biroq javob ololmadi.

Maqsuda Mustafoyeva, shuningdek, jurnalist va blogerlarga bir masala yuzasidan har xil ma’lumot berishga ham ulgurdi.

Besh nafar ayolning uyi uchun ajratilgan 100 million so‘m haqida gapirgan hokim yana bir gapida “Biz o‘sha paytda 20 million so‘mga uy qurib beramiz deganda yangi qurilayotgan uylarning boshlang‘ich to‘lovini shu mablag‘ hisobidan to‘lab berishni nazarda tutganmiz”, dedi.

Tuman hokimining qo‘shimcha qilishicha, toshkentlik tadbirkor tomonidan saxovat sifatida berilgan pullar murojaatchi ayollarni uyli qilish maqsadida mo‘ljallangan noturarjoy binolarni ta’mirlashga sarflangan.

“100 million so‘m saxovat puli uy uchun berilganini nazarda tutib, barcha ayollarni noturarjoylarni ta’mirlab uyli qildik. Ammo ikki nafari biz bergan uylarda yashashni istamadi”, — dedi Maqsuda Mustafoyeva.

Maqsuda Mustafoyeva “Kun.uz” muxbirining “Ayollarga saxovat qilingan 100 million so‘m noturarjoylarni ta’mirlashga sarflangan deyapsiz, xo‘sh bu qay darajada to‘g‘ri? Axir bu uylar hokimlik istasa, ertagayoq qaytarib olishi mumkin bo‘lgan noturarjoylar-ku. Balki murojaatchilar shundan norozidir. Ular ertaga bu joylar mendan olinib, boshqa birovga berilishi mumkin deyotgandir”, degan savoliga “Biz bu noturarjoylarni bir yilda hujjatlashtirib beramiz deb niyat qilgandik”, dedi. Hokim “bunga hozirda qonunchilik yo‘l qo‘ymaydi-ku”, degan e’tirozga “Biz bu masalaga qonuniy yondashamiz”, deya qisqa javob berdi.

Hokim matbuot birifingi so‘nggida ayollarning pulga da’vo qilayotganini eshitgach, ularning uch nafariga 20 million so‘mdan 60 million so‘m qaytarilishini, ammo ularga berilgan noturajoylar olib qo‘yilishini ma’lum qildi. Hokimning aytishicha, qaytarilayotgan 60 million so‘m jurnalist va blogerlar ko‘z o‘ngida murojaatchilarga topshiriladi.