Jahon sog‘liqni saqlash tashkiloti (JSST) 1999-yilda Malayziyada aniqlangan Nipah (NiV) virusi sababli yuzaga kelishi mumkin bo‘lgan pandemiya xavfi haqida ogohlantirdi. Bu haqda The Guardian’ga tayanib “Korrespondent.net” xabar berdi.
NiV juda tez tarqaladi, virus oqibatidan o‘lim darajasi 40—75 foizni tashkil qilishi mumkin. Kasallik simptomlarsiz kechishi yoki o‘limga olib boradigan ensefalitni keltirib chiqarishi mumkin. Mazkur kasallikning davosi hali topilmagan.
Virus Nipax daryosi bo‘yida yashovchi cho‘chqaboqar fermerlar orasida aniqlangan va shu nom bilan atalgan. Yovvoyi tabiatda uning tashuvchilari — Janubiy Xitoy, Janubi-sharqiy Osiyo, Yangi Gvineya va Avstraliyada keng tarqalgan qo‘lqanotlilar turkumiga kiruvchi mevaxo‘r uchar tulkilardir. Bundan tashqari, virus Afrikadagi xuddi shu turdagi qo‘lqanotlilarda ham aniqlangan. Shunisi e’tiborliki, hayvonlarning o‘zi kasallanmaydi.
Infeksiyani odamlar kasal cho‘chqalar orqali, shuningdek, tanasida virus mavjud qo‘lqanotlilar tekkan mevalar (birinchi navbatda, xurmo, yangi xurmo va xurmo sharbati)ni iste’mol qilish natijasida yuqtirgani aniqlangan.
NiV’ning oldini olish uchun JSST xurmo va boshqa yangi oziq-ovqat mahsulotlarini mevaxo‘r qo‘lqanotlilardan saqlashni tavsiya qiladi. Yangi yig‘ilgan xurmo sharbatini qaynatish, mevalarni iste’moldan oldin yaxshilab tozalash kerak.
Virusning odamdan odamga yuqish xavfini kamaytirish uchun JSST NiV bilan kasallangan odamlardan uzoq yurish, qo‘llarni muntazam yuvish va shaxsiy himoya vositalaridan foydalanishni tavsiya qiladi.
Avvalroq koronavirusning “britancha” shtammi 60 ga yaqin davlatda aniqlangani, Xitoyda koronavirus tarqalishining yangi o‘chog‘i paydo bo‘lgani haqida xabar berilgandi.
Izoh (0)