Rossiya TIV AQSh diplomatiga “Rossiya haqida yolg‘on ma’lumotlar tarqatganlik” uchun norozilik notasini topshirdi

AQShning Moskvadagi elchixonasi vakiliga Amerika ijtimoiy tarmoqlarida Rossiya haqida ishonchsiz ma’lumotlar tarqatilishi yuzasidan norozilik notasini topshirildi, deb yozadi Meduza Rossiya Tashqi ishlar vazirligiga tayanib.

“Amerika raqamli platformalari tomonidan Rossiya haqida katta ko‘lamda ishonchsiz ‘feyklar’ tarqalganini qayd etamiz, ular o‘z navbatida, Moskvadagi AQSh elchixonasi bilan muvofiqlashtirilgan holda tarqatiluvchi gijgijlovchi mazmunga ega axborotni muntazam ravishda ko‘paytirib keladi”, — deyiladi TIV xabarida.

Vazirlik qo‘shimcha qilishicha, 27-yanvar kuni Federatsiya kengashi tomonidan qabul qilingan bayonotni qo‘llab-quvvatlaydi. Unda kengash Amerika internet kompaniyalarini so‘z erkinligini cheklashda ayblagan va dunyo mamlakatlarini eng yirik ijtimoiy tarmoqlarning “cheksiz qudrati va o‘zboshimchaligini cheklash uchun” milliy qonunchilikni ishlab chiqishga chaqirgan edi.

“AQShdagi prezident saylovlaridan keyingi voqealar rivoji Amerika internet-gigantlari senzurani keng qo‘llash, shuningdek, muqobil platformalarni noqonuniy bloklash yo‘lidan ketganini ko‘rsatdi”, — deyiladi Federal kengash bayonotida.

Rossiya hukumati Kremlparast OAVlarning bloklanishi tufayli eng yirik ijtimoiy tarmoqlar tomonidan bo‘layotgan senzuradan ko‘p marta shikoyat qilgan. 2020-yil oxirida Rossiyada “Roskomnadzor”ga internet-resurslarni Rossiya OAVlariga nisbatan diskriminatsiya uchun bloklash imkonini beruvchi qonun qabul qilindi.

Yanvar boshida Twitter o‘sha vaqtda AQSh prezidenti bo‘lgan Donald Tramp akkauntini butunlay bloklab qo‘ydi. Bu Tramp miting chog‘ida o‘z tarafdorlarini Kapitoliyga borishga da’vat qilganidan keyin yuz berdi; namoyish Kapitoliyga shiddatli hujum bilan yakunlandi. Twitter rahbari Jek Dorsi Tramp akkauntining bloklanishi tufayli senzurada ayblandi. Dorsi bu xavfli pretsedent yaratgan bo‘lsa-da, to‘g‘ri qaror bo‘lganini aytdi.

Bir necha kun avval Rossiya TIV AQSh diplomatik missiyasi ijtimoiy tarmoqlarida 23-yanvardagi Aleksey Navalniy tarafdorlarining aksiyalari haqidagi xabarlar sababli AQSh elchisiga norozilik bildirgan edi. AQSh elchixonasi bunga javoban Amerika fuqarolarini ularning xavfsizligiga nisbatan potensial tahdidlar haqida axborot berishga majbur ekanligini bildirdi.