Dunyoning sobiq eng badavlat kishisi Karlos Slim koronavirus bilan kasalxonaga yotqizildi

Koronavirusga chalingan meksikalik milliarder Karlos Slim kasalxonaga yotqizildi. Bu haqda tadbirkorning rasmiy vakili va kuyovi Arturo Elias ma’lum qildi, deb yozmoqda “RBK”.

Vakilning so‘zlariga ko‘ra, Slim o‘zini juda yaxshi his qilmoqda. U davolanish mobaynida sog‘lig‘ini nazorat qilish uchun kasalxonaga yotqizilgan.

Slim 28-yanvar kuni 81 yoshga to‘ladi. U kasbi bo‘yicha muhandis hamda Meksikadagi eng boy odam. 2010-yilda Slim Forbes jurnalining milliarderlari ro‘yxatida Microsoft asoschisi Bill Geytsni ortda qoldirib, dunyodagi eng boy odamiga aylangandi. Slim 2013-yilgacha mazkur reytingda birinchi o‘rinni egallab kelgan.

Hozirda Forbes jurnali reytingida Slim 21-o‘rinni egallab turibdi. Gazetaning yozishicha, biznesmenning boyligi 58,7 milliard dollarga baholangan. Slimning koronavirus bilan kasallanganligi haqidagi xabarlar tarqalgach, uning boyligi 893 million dollar (1,5 %)ga kamaydi.

Slim Meksikaning yirik Telmex va América Móvil telekommunikatsion kompaniyalariga, shuningdek, restoran va universal do‘konlarga egalik qiladi. Shu bilan birga tadbirkor xayriya ishlarida ham faol ishtirok etadi. U mamlakatdagi ta’lim, madaniy va tibbiy loyihalarni moliyalashtiradigan Karlos Slim xayriya fondini tashkil etgan.

Xabarga ko‘ra, fond 2019-yil yozida koronavirusga qarshi vaksina ishlab chiqaradigan AstraZeneca farmatsevtika kompaniyasi bilan shartnoma tuzgan.

Bitim shartlariga ko‘ra, AstraZeneca vaksinani Argentinada ishlab chiqaradi, Meksikaning Liomont farmatsevtika kompaniyasi preparatni ishlab chiqarishning so‘nggi bosqichlari va qadoqlash uchun javobgardir. Preparatni sotib olish va ishlab chiqarish uchun mablag‘ Slim fondi tomonidan ajratilgan. 5-yanvar kuni Meksika AstraZeneca vaksinasini favqulodda vaziyatlarda qo‘llashni ma’qulladi.

Jons Hopkins universiteti ma’lumotlariga ko‘ra, Meksikada pandemiya boshlanganidan beri 1,78 million kishi koronavirus bilan kasallangan. Kasallikdan vafot etganlar soni bo‘yicha mamlakat dunyoda AQSh (427 ming), Braziliya (218,8 ming) va Hindistondan (153,7 ming) keyin to‘rtinchi o‘rinda turadi. Meksikada 153 ming kishi kasallik qurboniga aylangan.