Ijtimoiy tarmoqlarda Qashqadaryolik ota farzandlariga o‘ldirish bilan tahdid qilgani aks etgan videotasvir tarqaldi. Erkak nima sababdan bunday qilganini aytib berdi. Bu haqda “Yoshlar” telekanalida ma’lum qilindi.
Bolalar otasining so‘zlariga ko‘ra, uning rafiqasi Moskvaga ketgan va qaytib kelmagan. Bolalarning videosini yuborish orqali fuqaro A.R. xotinini qaytarib olishga harakat qilgan.
“Xotinim 2020-yil 20-yanvarda uydan ketib qoldi. Keyin u Moskvaga jo‘nab ketdi. Uning ketganiga 1 yil-u 3 kun bo‘ldi. Mart oyida men qaynonamga xotinimni olib kelib berishini aytdim. Qaynonam sudga berdilar.
Bir oy o‘tgandan keyin kunlarning birida ichdim va xotinim qaytib kelar balki deb shu videoni jo‘natdim. Dekabrgacha kutdim, kelmadi. Men qilgan ishim uchun juda afsusdaman”, – deydi ota.
Fuqaroning ushbu xatti-harakati bo‘yicha 2020-yil 6-oktabr kunida Qarshi tumani ma’muriy sudi tomonidan huquqbuzarlik sodir etilgan deb topilib, unga nisbatan bazaviy hisoblash miqdorining 3 baravari miqdorida jarima jazosi tayinlangan.
Shundan so‘ng ham fuqaro farzandlarini qiynashda davom etadi. Keyin holat yuzasidan 2021-yil 21-yanvar kuni Qarshi tumani IIB huzuridagi tergov bo‘limi tomonidan A.R.ga nisbatan Jinoyat kodeksining 110-moddasi (qiynoq) 2-qismi “a” bandi (voyaga yetmagan shaxsni qiynash) bilan jinoyat ishi qo‘zg‘atilib, qamoq ehtiyot chorasi qo‘llanilgan.
Ushbu holatlar inobatga olingan holda tuman hokimligi, prokuraturasi, IIB va jamoatchilik ishtirokida voyaga etmagan bolalar bobo va buvilarining qaramog‘iga olib berildi. Ularga vasiylik tayinlandi.
Avvalroq Navoiyda nogironligi bo‘lgan fuqaroning bo‘yniga arqon solib, azob bergan shaxs ushlangani, Sirdaryoda o‘gay qiziga zo‘ravonlik qilgan ayol ustidan jinoiy ish qo‘zg‘atilgani hamda Toshkentda o‘z xotiniga bolasining axlatini yedirgan erkak 3 yilga ozodlikdan mahrum etilgani haqida xabar berilgandi.
Izoh (0)