Samarqand shahridagi aholi ko‘chib o‘tgan binoning 2 ta qavati buzib tashlanadi — Qurilish vazirligi

Samarqand viloyati Qurilish bosh boshqarmasi Samarqand shahridagi 9 qavatli turar joy binosining 8—9-qavatlari buzilayotgani to‘g‘risida tarqalgan xabarlarga munosabat bildirdi.

Ijtimoiy tarmoqlarda Samarqand shahridagi Firdavsiy ko‘chasi 84-manzilda qurilgan yangi ko‘p qavatli uyda qurilish-ta’mirlash ishlarida kamchiliklar borligi, aholi binoga ko‘chib o‘tganiga ko‘p bo‘lmagan bo‘lsa-da, allaqachon buzila boshlagani, aksariyat fuqarolar qurilgan uyni o‘zlari qaytadan ta’mirdan chiqargani to‘g‘risida xabarlar tarqaldi.

Ma’lum qilinishicha, Firdavsiy ko‘chasi 84-manzilda joylashgan ko‘p qavatli bino “Pastdarg‘om qurilish mollari” MChJ tomonidan qurilgan. 104 nafar fuqaroning yakka tartibdagi uy-joylari sotib olinib, o‘rniga pishiq g‘ishtdan 9 qavatli uy-joy qurilgan. Binoda 534 ta xonadon mavjud bo‘lib, 392 tasi sotilgan.

Samarqand shahar hokimining qaroriga asosan ko‘p qavatli bino qurilish ishlari olib borilgan. “ToshkentboshplanLITI” tomonidan ko‘p qavatli turar joy binosi uchun xulosa berilgan, arxitektura rejalashtirish topshirig‘i ishlab chiqilgan. 2017-yilning 22-avgustdagi 4-sonli Arxitektura shaharsozlik kengashining bayonida ko‘p qavatli turar joy binosi qurilishi ma’qullangan. 2017-yilning 24-avgustida davlat ekspertizaning 1019—2017-sonli ko‘p qavatli turar joy binosini qurish bo‘yicha tegishli xulosasi olingan. Qurilish-montaj ishlarini olib borish uchun Qurilish nazorat inspeksiyasidan 2017-yilning 4-sentabrida 794/17-sonli ruxsatnoma olingan.

Qurilish-montaj ishlari Samarqand viloyati qurilish sohasida hududiy nazorat inspeksiyasi tomonidan 2017-yilning 4-sentabridan 794/17-son bilan ro‘yxatga olingan va nazorat ishlari olib borilgan. Obyekt qurilishi Respublika ishchi guruhi tomonidan o‘rganib chiqilgan hamda obyekt Samarqand shahri tarixiy markazining muhofaza hududida joylashganligi sababli turar joy binosining 7-qavatdan yuqori qismi (8—9-qavatlari) buzilishi belgilangan.

Samarqand shahar hokimligi tomonidan 2019-yil 13-martdagi shahar iqtisodiy sudiga binoning 7 qavatdan yuqorisini, ya’ni 8—9-qavatlarini buzish to‘g‘risida da’vo ariza kiritilgan. Sudning 2019-yil 8-maydagi ajrimi bilan ish yuritish tugatilgan. Madaniyat vazirligi hamda “ToshkentboshplanLITI” DUK bilan birgalikda bino balandligi hamda shaharsozlik normasi bo‘yicha xulosa berilgan. Binoni buzish bo‘yicha buyurtmachi tomonidan loyiha-smeta hujjatlarini ishlab chiqish hamda mulk egasi tomonidan buzilishi belgilangan.

“Bugungi kunda mazkur obyekt Samarqand shahri tarixiy markazining muhofaza hududida joylashganligi sababli qurilishda aniqlangan kamchiliklarni bartaraf etish, ya’ni Madaniy me’ros boshqarmasi talablariga muvofiq obyektning balandlik masalasi ko‘rib chiqilmoqda”, — deyiladi Qurilish vazirligi xabarida.