O‘zbekistonda 2020-yilda tazyiq va zo‘ravonlikka uchragan 14 744 nafar xotin-qizga himoya orderi berildi, deb xabar bermoqda O‘zA IIV Huquqbuzarliklar profilaktikasi bosh boshqarmasi muhim topshiriqlar bo‘yicha inspektori Nilufar G‘iyosovaga tayanib.
Orederlarning eng ko‘pi Toshkent shahri, Samarqand, Toshkent, Farg‘ona, Qashqadaryo, Andijon viloyatlari hamda Qoraqalpog‘iston Respublikasida berilgan.
Himoya orderi olgan ayollarning 11 mingga yaqini eridan himoyalangan. 6836 holatda ayollar jismoniy zo‘ravonlikka, 6281 holatda ruhiy bosimga uchragan, 1480 holatda esa tazyiq ostida qolgan. Orderlarning 121 tasi iqtisodiy, 56 tasi jinsiy zo‘ravonlik qurbonlariga berilgan.
Xotin-qizlarga nisbatan zo‘ravonlikning 73 foizi ularning oilalarida, qolgani jamoat joyida, ishxona va ta’lim muassasalarida sodir etilgan.
Nilufar G‘iyosovaning ma’lum qilishicha, himoya orderi berilgan oilalarda mahalla fuqarolar yig‘inlari vakillari bilan hamkorlikda olib borilgan profilaktik ishlar natijasida 8166 oilada er va xotin yarashtirilgan, 5046 oiladagi nizolar bartaraf etilgan.
Tazyiq o‘tkazgan yoki zo‘ravonlik sodir etgan yoxud ularni sodir etishga moyil bo‘lgan 146 nafar shaxs himoya orderi talablarini bajarmagani uchun ma’muriy javobgarlikka tortilgan.
Og‘ir ijtimoiy ahvolda qolgan, shu jumladan, oilaviy muammolar va turmushida zo‘ravonlikka duch kelgan, shuningdek, o‘z joniga qasd qilishga moyil bo‘lgan 302 nafar xotin-qiz zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish markazlariga joylashtirilgan.
Eslatib o‘tamiz, 2020-yilning sentabr oyida ayollarni tazyiq va zo‘ravonlikdan himoyalash to‘g‘risida qonun imzolandi. Qonunga ko‘ra, tazyiq va zo‘ravonlikdan jabrlanuvchi sodir etilgan zo‘ravonlik yoki tahdid haqida tegishli organlarga yoxud sudga murojaat etish, bepul huquqiy maslahat, ijtimoiy, psixologik, tibbiy va boshqa yordam olish kabi huquqlarga ega.
Izoh (0)