25-yanvar kuni Oliy Majlis Qonunchilik palatasining Yevrosiyo iqtisodiy ittifoqi bilan hamkorlik masalasini o‘rganishni tashkil etish bo‘yicha ishchi guruh yig‘ilishi bo‘lib o‘tdi. Bu haqda parlament matbuot xizmati xabar berdi.
Ishchi guruhning asosiy maqsadi YeOIIga a’zolikning ijobiy va salbiy jihatlarini chuqur tahlil qilish, boshqa xalqaro tashkilotlar va davlatlar bilan aloqalarga ta’sirini o‘rganib chiqishdan iborat bo‘lib, ishchi guruhga rahbar sifatida Qonunchilik palatasi spikerining birinchi o‘rinbosari Akmal Saidov belgilangan.
Yig‘ilishda tashkilotga a’zo mamlakatlar bozorlarida to‘liq ishtirok etishning huquqiy asoslarini o‘rganish, milliy texnik tartibga solish me’yorlarini tashkilot talablariga moslashtirish bo‘yicha ishlarni jadallashtirish zarurligi ta’kidlangan. Shuningdek, tashkilot bilan hamkorlikni tashkil etish bo‘yicha 2021-yilga mo‘ljallangan “Yo‘l xaritasi” muhokama qilinib, tasdiqlangan.
Bundan tashqari, yig‘ilishda sog‘liqni saqlash, qishloq xo‘jaligi va agrosanoat, mehnat migratsiyasiga oid yo‘nalishlarni ham o‘rganish kerakligi aytilgan.
Avvalroq YeOII texnik reglament talablarini qabul qilish, YeOII mamlakatlarida qabul qilingan 26 ta texnik reglamentlar asosida maxsus texnik reglamentlarni ishlab chiqish va tasdiqlash rejalashtirilayotgani to‘g‘risida xabar berilgandi. Rossiya bosh vaziri o‘rinbosari Aleksey Overchuk Gaydar forumida Rossiya 2020-yili Yevrosiyo iqtisodiy ittifoqida kuzatuvchi maqomini olgan O‘zbekiston yaqin istiqbolda ittifoqning to‘laqonli a’zosi bo‘lishiga umid bog‘laganini ma’lum qilgan.
Mavzuga doir: Rossiya elchisi: O‘zbekiston YEOIIda mustaqilligini yo‘qotishi haqidagi gaplar kulgili
Izoh (0)