O‘zbekistonda 28-yanvardan kafe va restoranlarning soat 08:00 dan 23:00 gacha bo‘lgan davrida faoliyat yuritishi bilan bog‘liq bo‘lgan cheklovlar bekor qilindi. Bu haqda 26-yanvar, seshanba kuni e’lon qilingan Respublika maxsus komissiyasi qarorida qayd etildi.
Unga ko‘ra, umumiy ovqatlanish korxonalari va ko‘ngilochar obyektlar Vazirlar Mahkamasining “Tungi vaqtda faoliyat yurituvchi umumiy ovqatlanish korxonalari va ko‘ngilochar obyektlarda jamoat xavfsizligini ta’minlashga doir qo‘shimcha chora-tadbirlar to‘g‘risida” 2019-yil 24-iyuldagi qarori talablari doirasida o‘z faoliyatini davom ettirishi mumkin.
“Shu o‘rinda ta’kidlab o‘tish joizki, bugungi kunda dunyoning qator mamlakatlarida koronavirus bilan bog‘liq vaziyatning keskinlashuvi natijasida hattoki ijtimoiy va iqtisodiy sohalar faoliyatini to‘xtatish kabi cheklovlar hamon davom etmoqda.
Respublika maxsus komissiyasi xalqimizdan koronavirus infeksiyasi tarqalishining oldini olish maqsadida sanitariya-epidemiologik qoidalarga qat’iy rioya etishlari hamda mamlakatimizda epidemiologik barqarorlikni ta’minlash borasida erishilgan bugungi vaziyatning bardavom bo‘lishi uchun shaxsiy mas’uliyatni oshirishlarini so‘rab qoladi”, — deyiladi bayonotda.
Eslatib o‘tamiz, 2020-yil 31-dekabr va 2021-yil 1-yanvar kunlari to‘yxona, mehmonxona, restoran hamda kafelarda 30 kishidan ko‘p bo‘lgan ko‘ngilochar tadbirlarni koronavirusga PZR-test yoki ekspress-test tekshiruvi asosida tashkil etilishiga istisno tariqasida ruxsat berilgandi.
Izoh (0)