Ижтимоий тармоқларда Қашқадарёлик ота фарзандларига ўлдириш билан таҳдид қилгани акс этган видеотасвир тарқалди. Эркак нима сабабдан бундай қилганини айтиб берди. Бу ҳақда «Ёшлар» телеканалида маълум қилинди.
Болалар отасининг сўзларига кўра, унинг рафиқаси Москвага кетган ва қайтиб келмаган. Болаларнинг видеосини юбориш орқали фуқаро А.Р. хотинини қайтариб олишга ҳаракат қилган.
«Хотиним 2020 йил 20 январда уйдан кетиб қолди. Кейин у Москвага жўнаб кетди. Унинг кетганига 1 йил-у 3 кун бўлди. Март ойида мен қайнонамга хотинимни олиб келиб беришини айтдим. Қайнонам судга бердилар.
Бир ой ўтгандан кейин кунларнинг бирида ичдим ва хотиним қайтиб келар балки деб шу видеони жўнатдим. Декабргача кутдим, келмади. Мен қилган ишим учун жуда афсусдаман», – дейди ота.
Фуқаронинг ушбу хатти-ҳаракати бўйича 2020 йил 6 октябрь кунида Қарши тумани маъмурий суди томонидан ҳуқуқбузарлик содир этилган деб топилиб, унга нисбатан базавий ҳисоблаш миқдорининг 3 баравари миқдорида жарима жазоси тайинланган.
Шундан сўнг ҳам фуқаро фарзандларини қийнашда давом этади. Кейин ҳолат юзасидан 2021 йил 21 январь куни Қарши тумани ИИБ ҳузуридаги тергов бўлими томонидан А.Р.га нисбатан Жиноят кодексининг 110-моддаси (қийноқ) 2-қисми «а» банди (вояга етмаган шахсни қийнаш) билан жиноят иши қўзғатилиб, қамоқ эҳтиёт чораси қўлланилган.
Ушбу ҳолатлар инобатга олинган ҳолда туман ҳокимлиги, прокуратураси, ИИБ ва жамоатчилик иштирокида вояга этмаган болалар бобо ва бувиларининг қарамоғига олиб берилди. Уларга васийлик тайинланди.
Аввалроқ Навоийда ногиронлиги бўлган фуқаронинг бўйнига арқон солиб, азоб берган шахс ушлангани, Сирдарёда ўгай қизига зўравонлик қилган аёл устидан жиноий иш қўзғатилгани ҳамда Тошкентда ўз хотинига боласининг ахлатини едирган эркак 3 йилга озодликдан маҳрум этилгани ҳақида хабар берилганди.
Изоҳ (0)