Buxoro shahrining bosh rejasiga ko‘ra, shahar hududi ikkita yondosh tuman hisobiga kengayadi. Bu haqda shahar hokimi O‘tkir Jumayev “O‘zbekiston 24” telekanali tomonidan Prezident Shavkat Mirziyoyevning Buxoroga tashrifiga oid tayyorlangan lavhasida ma’lum qildi.
“Buxoroda 280 mingdan ortiq aholi istiqomat qiladi. Bosh rejani ishlab chiqishda biz 2025-yilgi istiqbolda aholining 310 mingga yetishini hisobga olganmiz. Shu sababli bosh rejaga ko‘ra shahar hududini shimoli-sharqiy tomondan Kogon tumani (1920 gektar) va shimoli-janubiy tomondan Buxoro tumani (1630 gektar) hisobiga kengaytirish ko‘zda tutilgan. Bunda 2040-yilgacha ishlab chiqiladigan dastur bo‘yicha Buxoro shahri hududi 11 488 gektarni tashkil etadi”, — deydi O‘tkir Jumayev.
Buxoro hokimining so‘zlariga ko‘ra, shahar rahbariyati Prezidentdan shahardagi turar joy binolari renovatsiyasining ikkinchi bosqichini uzaytirishga ruxsat olgan. Loyiha 2018-yilda boshlangan bo‘lib, uning doirasida shaharning beshta ko‘chasida qurilish ishlari olib borilgan. Ya’ni ma’nan eskirgan ikki qavatli uylar o‘rnida 61 ta besh va yetti qavatli uylar qad rostlagan.
Qurilish va rekonstruksiyaning ikkinchi bosqichida yana 96 ta eskirgan uy qayta quriladi.
Izoh (0)