O‘zbekiston TIV Xitoyda bo‘lib turgan va u yerga borishni rejalashtirayotgan fuqarolarga ogohlantirish bilan chiqdi.
Vazirlik xabarida aytilishicha, so‘nggi kunlarda Xitoyning turli hududlarida, jumladan, Pekin shahri aholisi o‘rtasida COVID-19 koronavirus infeksiyasi bilan kasallanganlar soni ortayotgani sababli O‘zbekistonning Xitoydagi elchixonasi fuqarolarni bir necha jihatlarga e’tibor qaratishni so‘radi.
Qayd etilishicha, 2021-yil 19-yanvardan e’tiboran xorijiy mamlakatlardan poytaxt Pekinga keladiganlar sog‘ligini nazoratga olish uchun karantin muddati 28 kungacha uzaytirildi. Xorijdan Xitoyning boshqa shaharlari orqali Pekinga kirmoqchi bo‘lganlar poytaxtga kirishdan oldin o‘sha shaharlarda 21 kun karantinda bo‘ladi. Pekinga yetib kelgach, ularning salomatligi 7 kun davomida yana kuzatuvga olinadi.
Xitoydan O‘zbekistonga qaytish istagida bo‘lgan vatandoshlarga Sian—Toshkent—Sian yo‘nalishida charter havo qatnovlarini amalga oshirayotgan Xitoy aviakompaniyasi xizmatlaridan foydalanishi tavsiya etiladi. Talabalik guvohnomasini taqdim etgan talabalar uchun aviachipta xarid qilishda chegirma mavjud.
O‘zbekiston fuqarolari Xitoydan Seul shahriga (Janubiy Koreya poytaxti) yetib olishi va aeroport tranzit hududidan chiqmagan holda haftaning har juma kuni Uzbekistan Airways amalga oshirayotgan Toshkent—Seul—Toshkent yo‘nalishidagi reyslar orqali vatanga qaytishlari mumkin.
O‘zbekistonga qaytgan va o‘qishni/mehnat faoliyatini davom ettirish maqsadida Xitoyga qaytishni rejalashtirayotgan vatandoshlarga ta’lim muassasasi/ish beruvchi bilan bog‘lanib, o‘zlarining Xitoyga qaytishlari bo‘yicha maslahatlashib olish tavsiya etilgan.
Avvalroq O‘zbekiston TIV Qirg‘izistonga boruvchi fuqarolarni mamlakatga kirishda qo‘shimcha talablar qo‘yilgani sabab ogohlantirgandi.
Izoh (0)