Toshkentda Alisher Navoiy nomidagi davlat akademik katta teatri oldidagi konsert maydonida ochiq muz maydonidan so‘ng Iosis Fest rok-festivali o‘tkazildi.
Dasturga muvofiq muayyan bir kunda chiqish qilgan har bir rok guruhi konsert sanasi va vaqti ko‘rsatilgan reklama anonsini e’lon qiladi. Xususan, Flyin Up 24-yanvar kuni ushbu festival doirasida chiqish qilgan. Shu munosabat bilan ular ijtimoiy tarmoqlarda reklama afishasini e’lon qilgan bo‘lib, unda o‘zbek tilining asoschisi, donishmand Alisher Navoiy shu nomli teatr fonida qo‘lida elektron gitara ushlab turgan holda tasvirlangan.
Alisher Navoiy nomidagi davlat akademik katta teatri ma’muriyati bu holatga e’tiroz bildirgan va uni “bachkana ko‘rinish” deb atagan.
“Buyuk mutafakkir va faylasuf olim, o‘zbek tilining asoschisi, donishmand bobokalonimiz Alisher Navoiyni na dinimiz, na millatimiz va na tariximiz, qo‘yingki, o‘ziga ham aloqasi bo‘lmagan holatda, barmoqlarini bu ko‘rinishda, burni qizargan, g‘alati belgilari bor musiqa asbobi bilan tasvirlangani tushunarsiz... Afsuski, ba’zi blogerlar saviyasi shu darajadami yoki bu atayin qilingan qitmirlikmi?” — degan ma’muriyat va ijrochilardan hamda soha mutasaddilaridan rasmiy izoh va munosabat talab qilgan.
Flyin Up bunga munosabat bildirib, ushbu afisha tor doiradagi auditoriyaga — guruhning muxlislariga mo‘ljallangani, hech qayerda reklama qilinmagani, faqat guruhning ijtimoiy tarmoqlaridagi sahifalarida e’lon qilinganini bildirgan.
Guruh vakillariga deyarli yarim tunda qo‘ng‘iroq qilib, ularning chiqishi va festivalning o‘zi bekor qilinishining oldini olish uchun Alisher Navoiy obrazi aks etgan posterni olib tashlash “yumshoqlik bilan” so‘ralganini aytgan.
“Biz, tabiiyki, uni o‘chirib tashladik, chunki Toshkent anchadan beri ko‘rmagan shahar aholisiga ajoyib festival taqdim etgan tashkilotchilarning mehnatini qadrlaymiz”, — deb qayd etgan Flyin Up va guruh notijoriy, mustaqil guruh ekanligini, festival tashkilotchilari ularni o‘zlari ishtirok etish uchun chaqirgani, buning uchun ularga pul berilmasligini bildirib o‘tgan.
Shundan so‘ng afishaning yangilangan ko‘rinishini havola etgan.
Eslatib o‘tamiz, 7-yanvar kuni Alisher Navoiy nomidagi davlat akademik katta teatri oldida muz maydoni ochildi. U “aholi orasida sog‘lom turmush tarzi hamda sportni keng targ‘ib qilish” maqsadida tashkil etilgan. Muz maydoni bir oy muddatga o‘rnatilgan bo‘lib, bu vaqt mobaynida Dance Music Fest Winter, Iosis Fest, Tashkent Rap Festival kabi musiqa festivallari, xokkey bo‘yicha o‘smirlar chempionati, muz ustida raqs shousi kabi tadbirlar o‘tkaziladi.
Izoh (0)