Namanganda tadbirkorlik bilan shug‘ullanish istagida bo‘lgan fuqaroga yer ajratib berish uchun 700 dollar pora so‘ragan mahalla raisi ushlandi. Bu haqda “Yoshlar” telekanalining “Yangi davr” informatsion dasturida ma’lum qilindi.
18-yanvar kuni Namangan viloyati IIBga Namangan shahrida yashovchi fuqarodan ariza tushgan. Unda yozilishicha, fuqaro 16-yanvar kuni shahardagi mahallalardan birida savdo do‘koni qurib, tadbirkorlik qilish uchun yer maydoni bor-yo‘qligini bilish maqsadida mahalla raisining oldiga borgan. Rais va uning kotibi mahalla hududidagi avtoyo‘l bekati hamda do‘kon qurish uchun mo‘ljallangan yer maydonini ko‘rsatib, shu yerda do‘kon qurishi mumkinligini va buning uchun 700 dollar berishi kerakligini aytgan.
Mazkur arizaga asosan viloyat IIB Jinoyat qidiruv boshqarmasi Korrupsiya va iqtisodiy jinoyatlarga qarshi kurashish bo‘limi tomonidan xolis guvohlar ishtirokida tezkor tadbir o‘tkazilgan.
Tadbir davomida mahalla raisi o‘z xizmat xonasida fuqarodan 700 dollarni pora sifatida olayotganida ushlangan. Bundan tashqari, 2021-yil 18-yanvar sanasi bilan arizachi nomiga rasmiylashtirilgan rais va uning o‘rinbosari tomonidan imzolangan ikki nusxadagi dalolatnoma ashyoviy dalil sifatida olingan.
Ayni paytda holat yuzasidan tergovga qadar tekshiruv ishlari olib borilmoqda.
Avvalroq Yangiyo‘l tumanida o‘z mahallasi yerini sotmoqchi bo‘lgan mahalla raisi ushlangani, Xorazmda “bola puli” tayinlash evaziga 400 ming so‘m talab qilgan mahalla raisi qo‘lga olingani, Qashqadaryoda mahalla raisi MIB xodimini bolta bilan jarohatlagani to‘g‘risida xabarlar berilgandi.
Izoh (0)