O‘zbekistonning Korrupsiyaga qarshi kurashish agentligi ko‘plab tadbirkorlar va fuqarolar, shuningdek, ijtimoiy tarmoq foydalanuvchilarining Coca-Cola Ichimligi Uzbekiston Ltd MChJning xususiylashtirish jarayoni amaldagi qonunchilik va tartiblarga zid ravishda o‘tkazilayotganligi to‘g‘risidagi murojaatlarini o‘rganib chiqdi. Gap alkogolsiz ichimlik ishlab chiqaruvchi ushbu kompaniya ustav fondining 57,118 foizga teng davlat ulushi sotuvga qo‘yilishi jarayonlari haqida ketmoqda.
O‘rganishlar natijasi tender shartlariga kiritilgan bir qator talablar savdolarda qatnasha oladigan shaxslar doirasini keskin qisqartirishga hamda qator korrupsion omillarni keltirib chiqarishga sharoit yaratayotganligini ko‘rsatgan.
Agentlikning fikricha, ushbu mezonlar o‘ta yuqori va asoslantirilmagan talablar hisoblanadi va savdolarda ishtirok etishi mumkin bo‘lgan ehtimoliy ishtirokchilar sonini sun’iy cheklashga olib keladi.
“Ehtimoliy ishtirokchilar sonini keskin cheklash tender shartlarini bajara oluvchi kam sonli ishtirokchilar o‘rtasida haqiqiy raqobat bo‘lmasligiga va natijada davlat ulushiga past narx taklif etilishiga hamda buning oqibatida O‘zbekiston Respublikasi iqtisodiy manfaatlariga sezilarli darajada zarar yetkazilishiga olib kelishi mumkin”, — deyiladi agentlik bayonotida.
Shu munosabat bilan, Korrupsiyaga qarshi kurashish agentligi tegishli idoralarga quyidagi choralarni amalga oshirish maqsadga muvofiqligi yuzasidan taqdimnoma kiritgan:
- davlat mulkini sotishda tender savdolarini o‘tkazish bo‘yicha Davlat komissiyasi tomonidan yetarli raqobatga imkoniyat mavjud emasligi sababli mazkur tender jarayonlarini to‘xtatish;
- tender savdolarida ishtirok etishga ko‘proq talabgorlarni jalb qilish hamda teng imkoniyat va sharoitlar yaratish maqsadida xalqaro moliyaviy va huquqiy maslahatchilarning xulosalari asosida tender shartlarini yumshatish bo‘yicha ishlarni olib borish.
O‘zbekiston Davlat aktivlarini boshqarish agentligi Coca-Cola Ichimligi Uzbekiston Ltd MChJ ustav kapitalidagi 57,118 foiz ulushini oshkora sotuv jarayoni orqali sotish istagini 2020-yilning dekabr oyida e’lon qilgandi.
Ushbu kompaniya davlat ulushining sotilishi bo‘yicha ko‘rsatgan shartlar orasida sotib oluvchi kamida 7 yillik tajribaga ega bo‘lishi, yillik sof tushumi 200 million dollardan kam bo‘lmasligi, alkogolsiz ichimliklar bo‘yicha xalqaro tajribaga ega bo‘lishi kabilar keltirilgan. Bunday talablar “g‘olib xaridor oldindan aniq”, degan shubhalar paydo qilgan.
Dekabr oyida bosh vazir o‘rinbosari Jamshid Qo‘chqorov Coca-Cola’ning davlat ulushini sotib olish uchun 3 ta taklif tushganini, 70 million dollar berishga tayyor kompaniya bilan muzokara boshlanishini ma’lum qilgandi. Yanvar oyi boshlarida Turkiyaning Coca-Cola İçecek kompaniyasi Coca-Cola Uzbekiston’dagi davlat ulushini xarid qilish uchun ariza bergani ma’lum bo‘ldi.
Izoh (0)